Giovedì, 01 Ottobre 2026 - 14:37 Comunicato 2838

Neves contribuc fin al 100% per i prumes doi fies e remborsc al an fin a 2.500 euro

Bonus coa di fantolins: la Provinzia renforza l didament a la families e ai nascimenc

Traduzione in ladino

[Ladino] La Provinzia autonoma de Trent fèsc n nef vèrech inant per chel che vèrda l’inovazion de la politiches a la familia e per i nascimenc metan su n nef contribut economich per smendrèr i cosć di servijes educatives e de didament per la pruma infanzia. L intervent, aproà da la Jonta provinzièla, l é pissà per sporjer n didament per i prumes doi fies de la families enciasèdes te la provinzia de Trent e l raprejentea n didament concret che rua a corir fin al 100% la quota che resta a cèria de la families, a na moda che duc posse aer azes ai servijes e favorir coscita la gestion del temp anter lurier e familia. “Chest nef intervent su la coes per i fantolins no l é n provediment isolà, ma l fèsc pèrt de n percors organich e struturà che la Jonta la é do a portèr inant per ge stèr apede a la families man a man che les cresc. Peisse al assegn per l terz fi, a la reforma de la quota A del assegn unich, a la azions per la rivitalisazion di Comuns che risia n smendrament demografich o al “Bando Casa” per comprèr e fèr fora la pruma cèsa, ma ence al “bonus trasporc” per limitèr l aumet del priesc di carburanc. L obietif de duc chisc intervenc l é chel de dèr responetes concretes e de lonch termin a la families”, à dit l president de la Provinzia, Maurizio Fugatti.
“La Provinzia creit te la familia e, con chesta mesura, che comporta n investiment emportant sul bilanz publich, la desmostra de sostegnir i nascimenc con n intervent economich concret col renovèr a do a do i servijes – l é la paroles del vizepresident e assessor al svilup economich, lurier, familia, università e enrescida, Achille Spinelli-. “De gra a chesta mesura, dessema co la autres e anter chestes, apontin, l Bonus per l terz fi en doura col meis de messèl, la Provinzia conferma de voler se dèr ju per la families, per l’ocupazion de la eles, per la residenza e la permanenza sui teritories e per fèr acioche l teritorie sie per la families l lech olache realisèr projec de vita”.

Asilo nido

Chi che pel aer azes e la novitèdes di requisic
I destinatères del intervent l é la families con fies che à anter i trei meisc e fin de aost del an te chel che i compesc 3 egn. L benefizie l é per i prumes doi fies de la medema mère, tant biologica che adotiva, a condizion che i fae pèrt del fech del domandant e che i sie enscinué ai servijes educatives (coes di fantolins, coes di fantolins ti lesc de lurier, servije Tagesmutter) o ai servijes de didament acredité per la Zedoles de servije FSE+ te la provinzia de Trent.
Per azeder al contribut l domandant cogn aer la residenza anagrafica, un indicator de la condizion economica de la familia (ICEF Familia) no maor che 0,70 e che l abie jà portà dant la domana e ciapà l “contribut coa di fantolins” dat fora dal INPS.

Endrez del intervent economich
L intervent economich l vegn calcolà al net del valor de la Zedoles de servije FSE+, del contribut coa di fantolins INPS e de ogne auter contribut publich ciapà per la medema rejon. L rembors al an l podarà ruèr a na suma massimala de 2.500 euro per fì e endrezà a chesta vida:

ICEF ≤ 0,40 100% de la quota che resta (fin a max 2.500 €/an)
ICEF > 0,40 e ≤ 0,70 50% de la quota che resta (fin a max 2.500 €/an)

Dì de scomenz de la speises e modalitèdes de domana
L referiment temporal per la speises da poder ameter, per l an 2026, l scomenza col 1m de setember del 2026: da chesta data, la fatures manèdes fora da la coes per i fantolins les cognarà esser a inom de la medema persona che portarà dant la domana tant al INPS, per l contribut coes INPS, che a la Provinzia per chest bonus nido.
Se cognarà portèr dant la domana tras na piataforma online aposta sul sit de la Provinzia www.provincia.tn.it o tras i enc de patronat anter oril e setember del an do che se à abù la speises. Per chesta pruma fasa, vegnarà donca ametù la speises abudes a scomenzèr dal 1m de setember del 2026.
I criteries e i requisic de azes i é stac luré fora da l’Agenzia per la coejion sozièla de la Provinzia autonoma de Trent, che à la delega a la politiches familières, enveze la gestion operativa del intervent la é a cura de l’Agenzia provinzièla per l’assistenza e la previdenza integrativa (Apapi), desche la autres mesures economiches per la families.

Per maor informazions:
Provincia autonoma di Trento – Agenzia per la coesione sociale
Telefon: 0461 494110
E-mail: agenzia.coesionesociale@provincia.tn.it

Intervista a cura del ofize stampa:
https://drive.google.com/drive/folders/1NYj_ycdv8kDF-kFMZDC0Kbtd0Y_MA4fd?usp=sharing

Traduzion di Servijes Linguistics e Culturèi del Comun general de Fascia

(cdt)