Dai 14 ai 18 de setember l paisc de Sèn Jan l é stat viventà da sacotenc scultures che i à tout pèrt al simposie Toni Gross. Apede al argoment chierì fora per chest an che l era l “Overtourism”, l’autra neva l é stat chela de envièr a tor pèrt autra scoles d’èrt da etres lesc de la Èlpes desche  l Liceo Artistich Sello de Udin, l Liceo delle Arti de Trent e Rorei, l Liceo artistich Pascoli de Busan e l Lizeum d’ert Cademia de Urtijei. L é stat na ocajion de confront su la tecniches artistiches ma ence su n argoment a chel che i joegn i é n muie ascorc e sensiboi ajache l tocia l ambient e la nautra.    
Semper tel chèder del simposie, l “Overtourism” l é stat ence la tematica portèda dant per la meisa torona a chela che l é stat chiamà adalèrch l scritor Matteo Righetto, l diretor de l’APT de Fascia Nicolò Weiss e l hotelier e scritor Michil Costa. 
L Di dla cultura ladina, portà dant dal Ofize per la cultura e la scola ladina de Busan, chest an l é stat tegnù a Ortijei. L moto l era “Da na generazion a l’autra” per rejonèr belimpont del davegnir di ladins, ajache la realtà ladina la pel vardèr inant demò se rejonèda e cultura les vegn tramanèdes inant. La pèrt dantmesdì la é stata dedichèda ai referac e desche impuls da olà peèr via l é stat metù dantfora la costion del lengaz. L domesdì enveze l ge é stat dedicà a desvalives laboratories creatives endrezé da pèrt de duta la valèdes ladines, che à tout ite musica, èrt, letradura, conferenzes, jeghes per bec e auter amò. Auter moment de gran valuta l é stat la onoranza al “Merit Ladin” che chest an la é stata soradata ad memoriam al prum intendent ladin Franz Vittur. Autra premiazion l é stat l concors leterèr SCRIBO che per la sezion Junior l à vedù se vadagnèr l prum post na jona scritora da Fascia Nicoletta Riz.
I reports de chesta setemèna i é stac enjigné e porté dant da Angela Pederiva e Riccardo Zanoner.
Metù a jir col sostegn del Comun General de Fascia, de la Provinzia autonoma de Trent e de la Region autonoma Trentin – Südtirol, “Pedies” l va fora su Trentino Tv – canal 10 Prov. de TN- vigni sabeda da les 18.00 (sie da sera), de domenia da les 13.30 (mesa la does domesdì) e de lunesc da les 11.30 (mesa les doudesc). 
L program l va fora ence su AltoAdige TV – canal 11 Prov. de BZ - vigni domenia da les 18.00 (sie da sera).
Se pel veder duta la puntates ence sul canal YouTube de TV Ladina sot chest link:
https://www.youtube.com/@TvLadina. 
La puntata de chesta setemèna la vegnarà fora entorn la medema ora de la televijion.
Se pel veder i report un a un su la piata Facebook de TV Ladina.
https://www.facebook.com/TelevijionLadina. 

Traduzion di Servijes Linguistics e Culturèi del Comun general de Fascia