Azpe da hatt khött di diridjénten von Dianst vor di Zungmindarhaitn un auzantn sachandarn vodar Provìntz Elisabetta Sovilla, daz sèll boda khint vürgelekk, khint nå dar vornaügarung vor di drai djar boda khemmen vodar konventziong zbisnen dar autonome Redjong Trentino-Südtiról, GECT un da öffentlesche sender ORF, sa ågenump in vorgånnate månat vo abrèl vodar redjonàl Djunta. Dar prodjèkt rispundart in mångl zo opfra an informatziong dèstar vor alle, gianante obar in naüng didjitàln plattformen un di spèrrn gepuntet in teknolòdjege switch-off von djar 2022.
Ankunto in akòrd pitt EI Towers S.p.A., operatór vodar lokàl tèknesche nètz dar senjàl est bart giana betar baz vorå baldar iz gest gepuntet in sèll boda hatt trasmettart dar ripetitór vodar Paganella. Di pürgar bartn mang gian vürsnen z’sega di progrémm vo ORF afte kanél 75 (ORF1) un 76 (ORF Sport) von didjitàl earde pinn informatif trèff o azpe "Südtirol Heute".
An ende vodar Konferéntz dar asesór Marchiori hatt dena gedenkht in raich progråmm boda bart khemmen augelekk vor di achtzekh djar von Akòrd De Gasperi-Gruber, pittnan focus afte trèff boda seng azpe protagonìstn di zungmindarhaitn. Dar earst trèff bartze haltn atz 12 von herbestmånat atz Lusérn un bart håm azpe titl “80 djar dòpo in akòrd vo Parigi. Schützan un gem vèrt in zungmindarhaitnvodar autonome Provìntz vo Tria” augelekk vodar Stiftung Museo storico del Trentino un von Kulturinstitut Lusérn, ’z bartnda nemmen toal di vortretar con drai kulturinstitütt ladinar, möknar un zimbar. Atz 27 un 28 von bimmat in Buonconsiglio Slozz izta vürgelekk a tagung übar “Di autonomì azpe strumént vürzovüara da lånt kooperatziong: esperiantzàn un di pesten pratike vo kooperatziong in di européan State” augelekk von GECT Euregio, boda bart håm azpe focus bia zo macha stian pittnandar mearare zungen in di lentar auz nå in grentzan. Atz 11 von bintmånat, anvétze, in Palatz, setz vodar Provìntz, bartze haltn dar trèff “Zungmindarhaitn un autonomì di linguistìk rècht un baztaz impaitet” augelekk von Dianst vor di zungmindarhaitn un auzantn sachandarn vodar autonome Provìntz vo Tria.
Übarsetzt von Schaltarle vor di zung von Toalkamou vodar Zimbar Hoachebene
