Dar video un di brochure soin khent gemacht von djungen von prodjèkt TAGLab, di bèrkhstatt vodar hoach schual von Institùt Pavoniano Artigianelli vor da grafege kunst vo Tria, boda vüart di studjént djüsto diplomàrt zuar inan platz machanten ånemmen sèlbart arbatn zo macha alumma. Dòpo inar zait bosa håm studjàrt un gelìrnt un an åndra zait pratika, dise djungen håm gemacht zboa inforamtìf produkte, arbantante hèrta nidar nåmp pinn tèknesche von sektor Groaze Vlaischvrèzzar von provintziàl Gebillt Dianst, umbèkslante spetzialistege informatziongen in strumént vor alle, geschribet hoatar, bosa alle mang vorstian.

Dar tutorial iz gemacht alz kartoon un zoaget, in bintsche mearar baz zboa minùttn, di grüntlichen regln auzomacha un zo halta azpe ’z hatt z’soina an zou zo halta bait di vlaischvrèzzar. Di brochure haltet inn di gelaichegen sachandarn, darzuar machtze vorstian alln sött tèknesche sachandarn boda khemmen geschribet hoatar un dèstar zo lesa. Dise strumentn bartn khemmen gètt pittnåndar pinn elètrege zoü boda khemmen gètt in laigom åna zo mocha zaln von trentinar Forestél un bart mang khemmen gesek online o.

Disa initziatìf khint auz von sèll boda iz khent getånt in di lentar.
Di kontròlle boda soin khent gemacht håm gezoaget, dafatte, ke schiar dar 30% von zoü soin khent augemacht letz odar ma saiten nèt någestånt azpe ’z hatt z’soina.
Asó hattma zornìrt zo geba darzuar in struméntn zo schütza ’z vich informatziongen boda lirnen dèstar bia zo nützase an pestn.

Schauge å in video-tutorial, un di brochure un bazta khön di djungen.
> https://drive.google.com/drive/folders/10qvHplcceeYfkicleSSXW96a_7qgIW7E?usp=share_link

Übarsetzt von Schaltarle vor di zung von Toalkamou vodar Zimbar Hoachebene