A Cianacei tel chèder de Aperikino, olache duc i mèrtejes de messèl e aost l é evenc de musega che porta dant lengac e cultures desferentes, l é stat l conzert de Lia Sampai ciantarina catalana che à vent l ultim SUNS - festival european de èrt ti lengac de mendranza. L conzert, dut per catalan e con tinultima ence na ciantia per cuban, l é doventà n moment de dialogh anter mendranzes che se rejona te n lengaz universèl: chel de la musega.
L ritiro da d’istà del Genoa a Moena se à serà su do doi setemènes de arcedamenc e evenc per i tifousc sul ciamp Benatti. N bilanz pojitif tant per la squadra che per l teritorie, con na veièda ence al Genoa Summer Camp, a chel che à tout pèrt 150 joegn, e al davegnir de na colaborazion che da egn valorisea Fascia.
Co la intervistes ai capifrazion de Gries e Penìa, n aprofondiment en cont de la frazions che, metudes su te tempes veiores, les perveit na aministrazion aposta per gestir chela pèrts de teritorie, soraldut bosch e pèscol, patrimonie de duc i vejins de na vila. Porton dant i lurieres e i projec che chesta doi frazions les à sun desch; anter l auter, recordon che per Gries vegn pervedù gregn renovamenc per la strutures del parch e enveze per Penìa l é en esser l projet de renovèr la veia sia. La sia veneziana che, de grazia belimpont al enteressament de la frazion, chest istà la é endò en funzion e la restarà averta enfin a la fin de aost.
I reports de chesta setemèna i é stac enjigné e porté dant da Doris Valentini, Annarita Lollo e Riccardo Zanoner.
Metù a jir col sostegn del Comun General de Fascia, de la Provinzia autonoma de Trent e de la Region autonoma Trentin – Südtirol, “Pedies” l va fora su Trentino Tv – canal 10 Prov. de TN- vigni sabeda da les 18.00 (sie da sera), de domenia da les 13.30 (mesa la does domesdì) e de lunesc da les 11.30 (mesa les doudesc).
L program l va fora ence su AltoAdige TV – canal 11 Prov. de BZ - vigni domenia da les 18.00 (sie da sera).
Se pel veder duta la puntates ence sul canal YouTube de TV Ladina sot chest link:
https://www.youtube.com/@TvLadina
La puntata de chesta setemèna la vegnarà fora entorn la medema ora de la televijion.
Se pel veder i report un a un su la piata Facebook de TV Ladina.
https://www.facebook.com/TelevijionLadina
Traduzion di Servijes Linguistics e Culturèi del Comun general de Fascia
