’Z khemmenda vürgelekk drai kategorìan boda pazzan aftz dise livèlln:

    • Livèll 1: untarschual (Südtiról, Trentino) Volksschule (Tiról);

    • Livèll 2: mittlschual (Südtiról, Trentino), mittlschual (Tiról – Mittelschule un di earstn zboa djar vo AHS);

    • Livèll 3: earstn zboa djar vodar obarschual (Südtiról, Trentino) earstn zboa djar vodar obarschual (Tiról).

'Z soinda zen didaktìk module übar tème azpe stordja, zungen, mobilitét odar identitét. Nå in sèll bosa sa khånen, di klassi mang zornìrn umman odar mearare tème nå in schual livèll bosa håm. Di format boda khemmen gevorst in djungen toalnemmar soin nå un nå hèrta mearar malamentrar: von poster afte naüng media, odar afte arbatn håntgemacht odar no, khurtze film un performance art, musìk un leteratùr. Aftz allz izta sobiso gevorst a groaza kreativitét.

Di klassi mang nemmen toal innschraibantese online afte sait scuola.euregio.info , un dena draulengante soine arbatn. 
’Z barta khemmen zornìrt da peste klasse vor aniaglana kategorì un vor aniaglaz lånt. In di kategoria 1 un 2, dise klassi bartn khemmen gerüaft zo nemma toal aftnan evént zo macha verte alle pittnåndar. In di kategorì 3, anvétze, di klasse zornìrt bartn nemmen toal in an trèff vo zboa tang in ummaz von drai lentar von Euregio. Alle di schualn boda nemmen toal, vor daz gåntz schualdjar, bartnse mang khön “Schual Euregio”.

Di djar boda khemmen di plattform online bart khemmen no mearar auzgebetart. ’Z bartnda vennen platz di sachandarn boda ågian “Euregio goes school”: di lestn von madjo, defatte, barta åhevan di initziatìf augehaltet voda Européan Uniong, drinn in Interredjonàl progråmm Bleschlånt-Österraich boda bart zuarleng alle di opfarn von schualn von Euregio Tiról-Südtiról-Trentino boda bartn khemmen gelekk pittnåndar vor alle.

Übarsetzt von Schaltarle vor di zung von Toalkamou vodar Zimbar Hoachebene