Te anter la mesures de stravardament de la mendranzes linguistiches de la Provinzia de Trent l é pervedù n organism aposta che l à inom Autorità per la mendranzes e l à l doer de vardèr do l status de defendura de ladins, mochegn e zimbres. En lunesc ai 20 de oril l’Autorità la é ruèda te Fascia per scontrèr i raprejentanc locai de duta la istituzions e de chi che se dèsc ju coi aspec che revèrda la realtà ladina a livel linguistich e culturèl. N moment de confront e debatit per scutèr su e aer indicazions en cont di desvalives setores che revèrda la defendura e la promozion de la comunanza ladina de Fascia. Te la scontrèda l é stat metù al luster desvalives elemenc positives ma l é vegnù fora ence problemes olache se cognarà vardèr de lurèr do duc dessema.

Chest an la 20eisema edizion de Cianta con nos, l festival di cores de bec e bezes de duta la Ladinia endrezà da la Union Generèla di Ladins dla Dolomites, l é stat portà dant a Busan. L è stat la pruma outa che la manifestazion, per voler de la Comunanza Ladina, la é ruèda te zità. Chest an à tout pèrt i cores de Selva de Gherdena, Mareo da la Val Badia, da Fodom, da Busan, da Terlan e scinamai dal Friul. Per Fascia à tout pèrt l cor interregional de “Le Muse e le Dolomiti”. La musega e l ciantèr adum, l é stat dit, i raprejenta n gran valor identitèr, l é na èrt con chela che la popolazion la pel palesèr so esser, la deida tegnir adum, la dèsc ligreza e voa de viver! 

Per la rubrica de aprofondiment “Zebicher, per veder più davejin”: rejoneron del MUSE e de sia scomenzadiva con chela che l é stat portà dant la guida al museo ence per ladin, mochen e zimber.
L MUSE, l museo de scienzes de Trent, l é un di musees più de nonzech de la Tèlia. L é struturà te 6 partimenc olache se pel cognoscer e esplorèr la natura, l ambient da mont, la tecnologia e la sostegniboltà. Per la spiegazions l é stat enjignà na guida audio te 13 lengac internazionèi e ades l é stat jontà apede belimpont ence la vrescion ladina, mochena e zimbra. N lurier inclusif fat en colaborazion con Anffas e col liceo di lengac de la Scola ladina de Fascia che l à vedù studenc e studentes se dèr ju con enrescides e argomenc de carater tecnich e scientifich.

I reports de chesta setemèna i é stac enjigné e porté dant da Riccardo Zanoner e Angela Pederiva.

Metù a jir col sostegn del Comun General de Fascia, de la Provinzia autonoma de Trent e de la Region autonoma Trentin – Südtirol, “Pedies” l va fora su Trentino Tv – canal 10 Prov. de TN- vigni sabeda da les 18.00 (sie da sera), de domenia da les 13.30 (mesa la does domesdì) e de lunesc da les 11.30 (mesa les doudesc). 

L program l va fora ence su AltoAdige TV – canal 11 Prov. de BZ - vigni domenia da les 18.00 (sie da sera).

Se pel veder duta la puntates ence sul canal YouTube de TV Ladina sot chest link:
https://www.youtube.com/@TvLadina

La puntata de chesta setemèna la vegnarà fora entorn la medema ora de la televijion.

Se pel veder i report un a un su la piata Facebook de TV Ladina.
https://www.facebook.com/TelevijionLadina

Traduzion di Servijes Linguistics e Culturèi del Comun general de Fascia