Na piataforma che va sorafora la seides per la crescimonia di joegn
L Consei di Joegn met a la leta na piataforma acioche i joegn tole pèrt a duta la dezijions di orghegn EUSALP e l arsegura che idees e pensieres che i porta dant i vegne touc en conscidrazion. Chi che tol pèrt se dèsc ju per l svilup de politiches e de projec per l’area alpina portan dant azions concretes, projec e scomenzadives, ge portan dant idees ai politics di Stac e de la regions de EUSALP e sensibilisan en cont de la particolaritèdes de sia regions a livel european. 
I joegn empèra a tor pèrt a n prozes democratich, se confrontan con desvalivanzes linguistiches e culturèles. Enveze EUSALP empèra dai joegn a tor su de neva idees da chi che vivrà tel davegnir tel raion alpin. 
L Consei se bina cater o cinch outes per ogne mandat e l colaborea fora per l an tras strumenc de comunicazion virtuèla te gropes tematics per lurèr fora ativitèdes concretes. I joegn en cèria i se dèsc ju per la mobilità sostegnibola, i se taca ite a de autra scomenzadives per joegn, i laora per la prospetives del davegnir te la regions alpines periferiches e i sensibilisea dintornvia l patrimonie naturèl e culturèl de la Èlpes. 

Se pel se candidèr scin ai 12.05.2026
Ge vel manèr ite la candidadures tras l portal EUSALP . Dal Consei di joegn se vel fèr vegnir fora la desvalivanzes tel raion alpin, per chesta rejon ge volarà pissèr su a chesta selezion, per arsegurèr  che sie n balanzament anter i joegn candidé di set paijes EUSALP, per naa, jender e esperienza te organisazions de joegn. 
I Stac e la regions EUSALP corirà la speises de viac per scontrèdes e evenc a chi che tolarà pèrt i comembres del Consei e i sporjarà consulenza e suport. Per saer vèlch de più: : https://alpine-region.eu/alpine-youth .

EUSALP (EU Strategy for the Alpine Region) l é na strategia Macroregionèla metuda su del 2015 dal Consei European per l renforzament de la cooperazion sorafora la seides e interregionèla sun n area geografica spezifica, chela de la Èlpes, per ge responer a endesfides de grop. Fèsc pèrt de EUSALP set paijes: cinch comembres de la UE (Tèlia, Franzia, Gerrmania. Austria e Slovenia) e doi extra UE (Svizra e Liechtenstein), con 48 regions en dut, più la doi Provinzies autonomes de Trent e Busan. La Strategia se met dant na gestion sostegnibola de la ressorses naturèles e culturèles e la é outa a favorir la conescion e l azes ai teritories da mont, tras azions che sostegn sie svilup. 
De autra informazions su https://alpine-region.eu/.

Enjonta: Placat 

Traduzion di Servijes Linguistics e Culturèi del Comun general de Fascia