[Ladino] Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata n. 509. I argomenc che vegn portà dant te la puntata de chesta setemèna l é:
L benvegnù a Don Mario Bravin da pèrt de la Curazies de la val de sot che en domenia passèda les à endrezà na gran festa te gejia de la Madona del Aiut a Poza. Purampò ge vel dir che da ades inant sarà n preve soul per duta Fascia e l cognarà se rejer ot curazies. Duta la comunanza la lo à tout dant de bon cher e la ge à fat a saer che la ge stajarà apede e la vardarà de portèr so didament te sia miscion. Ence per chest don Mario l à dit che no l é sprigolà e che l fat de aer la jent apede ge dèsc “forza e coragio”. Amò apede, a didèr do, sarà ence l capelan de Ciavaleis e don Bruno da Moena.
La Domenia del Rengraziament de chest an la é stata dedichèda ai 70 egn de la Union di Ladins de Fascia. Per l’ocajion l é stat fat na festa olache l é stat recordà i fondadores che i à sotscrit l prum statut: don Massimiliano Mazzel, Giacomo Jellici, Simone Sommariva e Giovanni Rizzi. Apede, l é stat portà dant i venjidores del concors “Let’s Stick Ladin”; na bela pissèda che co la vertola de n adesif l’à soscedà enteres, curiosità e devertiment a chela che à tout pèrt sacotenc gropes e n muie de joegn. L é amò da dir che per i 70 egn, l’Union l’à amò en program la prejentazion de n liber per contèr di fac e di avenimenc de sia storia.
Te l’ultima sescion del Consei General chiamèda ite en mercol ai 15 de otober, l era 13 ponc al orden del dì; anter chisc la mozion per tor pèrt al apel “Salviamo Gaza” e la nomina de trei comiscions: chela istituzionèla, chela per la scola ladina e chela per la toponomastica. Con chesta nomines de carater organisatif e operatif, la neva aminstrazion del Comun General la se enjigna a meter en esser i obietives e i projec desche pervedù da la linees programatiches.
L FAI de Fascia e Fiem l à endrezà n fin de setemèna de raides e spazirèdes anter L Forn, Medil e Valsorda per cognoscer sia storia, tradizions e ambient. Più avisa, col didament de esperc de storia locala, l program l pervedea de jir a veder la cava de la bores e la scrites di pèstres de Valsorda fates amò del 1800 col bol del Latemar. Lesc de marevea e riches de curiositèdes che à soscedà l enteres de chi che à tout pèrt.