Dar Trentino hatt sa gelirnt vil aftz ditza ankunto in européan prodjèkt LIFE FRANCA, boda hatt inngevüart naüge struméntn zo nütza zo geba garadege informatziongen, struméntn boda innvången aministratör, famildje un studjéntn. Gåntz guat soinda gånt di sachandarn boda soin khent getånt pinn studjént vodar mittlschaul boda, durch labör un didaktik strumentn gemacht lai vor ditza – zbisnen disan an comics gemacht ad hoc – håmsa gemak vorstian mearar un lirnen bazta geat getånt un dena håmsa gemak machan khennen dise sachandarn in eltarn o.

Dar naüge prodjèkt iz starch gepuntet in Strategesche Progråmm vo Arge Alp übar in tèma “Drauschang pellar afte natural riskie un afte katastrofe”, gitt zuar zo lega panåndar alle dise esperientzan un darzuar seng un vorstian bazta  tüan di åndarn alpinar redjongen o, vürvüarante pittnåndar komunikatìf stratedjian. Trentino, Lombardia, Tiról, Saltzburg Tessin Kantòu un Südtiról bartn arbatn asó pittnåndar geschützt vodar Bavìara, von Graubünden Kantòu un von  Vorarlberg, zo vorstiana bele strumentn zo nütza zoa zo maga håm an uantzegen kulturàl grunt vor di kamòuschaftn von gåntz alpinar raum.

In dise zboa djar boda bart innhaltn dar prodjèkt bartnda khemmen augelekk trèff boda bartnse vennen drauzoreda tèknesche un aministratör un no, workshop vor di pürgar un initziatìvan augelekk garade vor di schualn, sin zo riva aftn lest tagung boda bart khemmen gezoaget bazma hatt getånt un bo ma sait gerift. Dar gåntz prodjèkt iz gezalt vo Arge Alp boda untarlekk in gåntzan 120.000 euro, dar prodjèkt iz darkhennt azpe stratègesch vodar arbat Kamòuschaft boda in allz daz sèll boda khint getånt lekk hèrta vorånavür schützan di umbèlt, adatarnse in klima bèkslom un abelirnen di naüng djeneratziongen. 

Übarsetzt von Schaltarle vor di zung von Toalkamou vodar Zimbar Hoachebene 

Arge Alp in an arbat kamòuschaft augelekk atz 12 von bimmat von djar 1972 atz  Mösern, in Tiról, pinn zil z’arbata übar tème boda ågian alln un boda innvånk schiar 26 mildjü laüt.
’Z nemmnda toal in Arge Alp, ’z Taütschlånt pinn Frai Stato vodar Baviara, ’z Österraich pinn Länder Vorarlberg, Tiról un Saltzburg, ’z Beleschlånt pinn zboa autonome Provintzan vo Poatzan un Tria un pittar Redjong Lombardia, di Svaitz pinn Kantöü Graubünden, Saknt Gallen un Tessin.