Traduzione in mòcheno
Etnografische museum, s vònk u’ der bando ver za unterstitzn de projektn van 2025
Gerosa: “De Entnografische museum sai’ a raicheket ver de kultur van Trentin”
[Mòcheno] De provinzaljunta hòt u’ganommen en vraita as de 11 van heibeger, pet a mosnemm voutschbunnen van kulturasesor Francesca Gerosa, der bando 2025 ver za unterstitzn a toal projektn enviretrong van etnografische museum derkennt va de autonome Provinz va Trea’t, ver de doin projektn hòt men u’stimmt za gemen ver en doi jor 240.000 euro.
“De projektn sai’ tschbunnen za derhòltn ont giltn de lokalkultur, de praich van lait ont der folklor ober gor de dialektn ont s bissn. Ber tschbinnen zan paispil en de regiarung va de lòntschòft, van balder, van hiatn ont van ourt, en toalnemmen van lait ver de regiarung van òllgamoa’dinger, en pahalter van lait pet ritualn, tenz ont musik. Gem gèlt en de doin museum billt song glam en de inger gschicht ont billn sa hòltn lebet, asou as s sai’ gadenk tuat se nèt verliarn” - hòt kein de asesor Gerosa.
De vrong kemmen tschickt nèt no 30 ta va benn as ist kemmen u’ganommen der bando en de Unitet va stetegische mission ouberregiar van kulturpahalter ont der viarer va de doi struktur schauk aus de vrong ont benn s ist, gip aus der paitrog. Ber as kriak der doi zuazol bart darbischn en 2025 s hòlb gèlt va sèll as istn kemmen verhoasn ont s ònder hòlb bartn kemmen gem en 2026, benn as men schauk rècht òlla de kostn van projektn as sai’ kemmen enviretrong.
En bando meing toalnemmen de etnografische museum as sai’ derkennt: hait sai’sa 89 de etnografische museum as sai’ inntschrim en de list u’ganommen va de provinzalamministrazion.
Der model va de vrog kònnt sai’ oarganommen va de istituzionalsait www.provincia.tn.it en de ta as kemmen.
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
(cdt)
Immagini
