
Da untar khurtz di prodjèkte zornìrt:
“ADES - Restituire valore alla manualità artigiana per dare un futuro alla montagna in Trentino”
A prodjèkt inngètt von Alessio Ramundo vor di kategorì "firmen un start-up".
Durch dar mittarbat zbisnen designer, håntarbatar un di kamöüschaftn von lentar, dar prodjèkt trakk vür zo macha möbl un åndarz geplèttra vorz haus pitt holtz un loimat durch traditzionàl tèknische un naturàl matardjéldar. Dar nåm “ADES”, boda in trentinar dialèkt bill soin gemuant est, bill merchan di aile zo legadese eppaz zo tüana åna zo vorlìara zait. Dar prodjèkt bill nèt lai eppaz aumachan ma dar bill darzuar lirnen un leng panåndar djunge un alte un pintn di altn pinn naüng djeneratziongen. ’Z iz a mustar boda mage khemmen genütz mearare vert, boda gitt vèrt in pèrge azpe a platz vor da zuarkhemmane, un nèt lai von gedenkh vo dise djar. Arbatante pittnåndar pitt tischlar un bebar von lånt khinta zuargètt zo maga lirnen garade in di bèrkhstattn boda dise sachandarn khemmen gemacht. ADES schupft auzolega mikro firmen un mittarbat zbisnen designer un håntarbatar. Soi gesega haltet kunt vodar umbèlt süachante zo tüana daz peste. Di matarjdéldar boda khemmen genützt, holtz un loimat, soin naturàl un mang khemmen gevuntet in lånt o. Darzuar dar prodjèkt lekk au nètz zbisnen djeneratziongen un zbisenen profesionìstn pinn zil zo halta djungen in di lentar. Di pintom pinn pèrge asó iz nèt lai estètisch, ma ekonomìk, formatìf un sotziàl.
“Progetto Valle dei Laghi”
Vorgelekk von tèknesche ekonomìk Institùt I.T.E. “Antonio Tambosi” vo Tria vor di kategorì “schualn”, dar schual diridjént iz dar Andrea Bezzi.
Dar prodjèkt, boda bart innhaltn zboa djar bill gem vèrt in pèrge aulegante sportìf trèff in di månat auz vodar turistìk djarzait in Valle dei Laghi. Dar prodjèkt iz augelekk vodar draite klasse boda lirnt “manager vo sport boma mage auhaltn” boda hatt ågeheft a morfologesche, idrografesche, stòrege un sotzio-ekonomesche analise von lånt un an analise von stòregen monuméntn. Darzuar khinta gehaltet starch kunt az saibe dèstar zuargian un azza alle mang nemmen toal. Ma bart arbatn aftz zèrte spòrt un herzorichta alte gehaüs von lånt arbatante pittnåndar pittn network OSPITAR, zoa zo maga ånemmen mearare turistn schedegante daz mindarste boma mage di umbèlt. Tünante asó gèttma o arbat in djungen. Dar prodjèkt machtze no raichar gebante vèrt in sèll boda khint prodürt in lånt azpe “Vino Santo” öl, khes, vlaisch, frukte un hone.
Arge Alp in an arbat kamòuschaft augelekk atz 12 von bimmat von djar 1972 atz Mösern, in Tiról, pinn zil z’arbata übar tème boda ågian alln un boda innvånk schiar 26 mildjü laüt.
’Z nemmnda toal in Arge Alp, ’z Taütschlånt pinn Frai Stato vodar Baviara, ’z Österraich pinn Länder Vorarlberg, Tiról un Saltzburg, ’z Beleschlånt pinn zboa autonome Provintzan vo Poatzan un Tria un pittar Redjong Lombardia, di Svaitz pinn Kantöü Graubünden, Saknt Gallen un Tessin.
Übarsetzt von Schaltarle vor di zung von Toalkamou vodar Zimbar Hoachebene
Download un interviste da