[Ladino] Na idea nasciuda dal Istitut Comprensif Folgaria Lavarone e Luserna, condividuda e finanzièda dal Servije mendranzes linguistiches e relazions esternes aldò del art. 24 de la lege provinzièla 6 del 2008, che la perveit n fon dedicà a la defendura de la popolazions de mendranza. Presciapech 18 bec che chest an i é do a fenir la clas seconda de la scola mesèna, i à dezidù de mudèr la storia de sia comunanza te n jech da desch, che l posse meter ensema devertiment e estro de jir a descorir l teritorie e sia reijes. “Viac a Luserna” l é na aventura anter i troes de chest paisc cimbro, olache ogne tassel l à ite na contia, na parola tel lengaz cimbro o n empediment da passèr fora. N jech con regoles che ge va do a cheles del jech de l’aucia, olache se scontra l Basilisco, che doventa n aversarie e l Sambinelo, n zeberchie che l ge roba la chèrtes a chi che no à respet per la natura. L gran tabelon da color e l projet, frut de na vijita didatica te Fascia fata acà n pech de temp e che a chesta vida l sporc n pont anter la doi comunanzes de mendranza linguistica ladina e cimbra, l é stat portà dant al publich e a la autoritèdes locales belimpont anché a Luserna, aló da la Sala Bacher, olache à tout pèrt i bec, la dirigenta de la scola Roberta Bisoffi e la ensegnantes del Istitut Comprensif. L era ence l comissèr de Luserna Nerio Giovanazzi, l president de la Magnifica Comunità di Altipiani Cimbri Isacco Corradi, la presidenta del Istitut cimbro-Kulturinstit Lusérn Monica Pedrazza e l diretor Willy Nicolussi Paolaz. Duc à palesà de aprijièr l projet che l ne moscia cotant che i joegn e la scola i à a cher l stravardament e la valorisazion del lengaz e del patrimonie storich e identitèr de la comunanza.