Lunedì, 17 Febbraio 2025 - 16:22 Comunicato 349

Traduzione in ladino

Nef ospedèl, na gran adejion al prozes partezipatif

Se à serà su i trei dis de scontrèdes endrezèdes ti paijes de la Val de Fiem

[Ladino] Per trei seres, i sentadins de Fiem, de Fascia e de Cembra, valèdes enteressèdes dai lurieres per frabichèr la neva strutura sanitèra, i à podù se palesèr e scutèr i detaes de chel che l é vegnù fora endèna la sie scontrèdes tematiches a cheles che à tout pèrt, anter november e jené, i raprejentanc de la categories tecniches (architec, enjegneres, dotores, infermieres), e i raprejentanc del setor ambientalist, culturèl, economich e del volontariat.
“La scontrèdes co la jent, desche ence i etres momenc endrezé tel chèder del percors de partezipazion, bensegur i à abù fazion”, chest l coment del assessor a l’urbanistica, Energia e Trasporc de la Provinzia de Trent, Mattia Gottardi. “I à dat l met de smaorèr la consaputa de cotant che la situazion posse esser complichèda e donca de la gran cantità de fatores che ge vel conscidrèr canche se dezidarà. Amò apede, l é ence la desmostrazion che per chel che vèrda l’argoment del ospedèl de la valèdes de la Veisc, no se vel se imponer”.

incontri in Val di Fiemme, processo partecipativo del Nuovo ospedale [ Archivio Ufficio Stampa PAT]

A la trei scontrèdes, endrezèdes a Ciavaleis, Pardac e a Tieser, à tout pèrt presciapech 200 jent en prejenza. A chisc se n’à jontà ite amò presciapech 300 che à tout pèrt al event en direta en streaming sul canal Youtube de la Provinzia.

Te ogne scontrèda i sentadins di desvalives comuns à podù se palesèr dintornvia i criteries de localisazion del nef ospedèl. I intervenc i é stac n muie, da chi che l é vegnù fora che, sun sacotenc aspec, la jent la é a una: tropes à domanà che l nef ospedèl l vegne fat su demò do da na vijion chièra de la doura del veie frabicat de Ciavaleis e che ge vel schivèr de durèr teren, te n teritorie olache l om à jà fat su tropes frabicac e cèses, acioche l ecosistem no l vegne danejà amò de più e no vegne cavà etres terens resservé a l’agricoltura.

Tel medemo temp i sentadins i à domanà che l ospedèl l vegne coleà miec che l é meso tel sistem sanitèr local, arseguran servijes e personal adatà, percheche demò la localisazion, da soula, no l é la soluzion al problem de gestion de la cures che serf, soraldut te la situazions più ries. En cont de chest l é stat domanà più outes de troèr fora arees da durèr desche cèses per infermieres, praticanc, e per autra fegures sanitères.

“De gra a la proponetes vegnudes fora, che les vegnarà registrèdes e cataloghèdes, luraron fora l prum document che l ge vegnarà portà dant per na valutazion a la Jonta provinzièla e che do l ge vegnarà portà dant a la comunità teritorièla de Fiem per tor la dezijion definitiva”, à despiegà Giovanni Gardelli, dirigent del Dipartiment Urbanistica de la Provinzia.

Per se palesèr e tor pèrt a la dezijion de la localisazion del nef ospedèl, i sentradins à amò doi setemènes de temp: scin ai 28 de firé, de fat, i podarà portèr dant proponetes e osservazions che les vegn publichèdes su la piata del prozes partezipatif (chiò l link a la osservazions ruèdes ite). Su la medema piata l é ence a la leta duc i ac e i documenc da tor ca per poder se palesèr a na vida razionèla e con consaputa.

Desćèria service video intervistes drucan chest link

Intervista assessor Gottardi