Martedì, 11 Novembre 2025 - 10:47 Comunicato 3328

La Utia da mont Roda de Vael e la Baita Pederiva tachèdes te la rei comunèla e al depurator. La situazion te la scontrèda col president Fugatti tel Consei de Comun de Sèn Jan

Roda de Vael, sturté su i lurieres per l coletor de la èga pazes

Traduzione in ladino

[Ladino] Se se à serà su i lurieres per l coletor de la èga pazes che taca la Utia da mont Roda de Vael e la Baita Marino Pederiva te la rei del paisc daVich e al depurator biologich de Poza, te Fascia. N lurier finanzià da la Provinzia autonoma de Trent, per na suma de 1.984.600,00 euro en dut, e endrezèda da l'Agenzia per la depurazion, che la fèsc pèrt de n percors portà inant adum co la aministrazions e la realtèdes del teritorie: l'aministrazion de Comun de San Giovanni di Fassa –Sèn Jan, la Frazion da Vich, l Consorzie Eletrich Poza, la Sozietà alpinisć tridentins-SAT.
N aspet uzà fora te la scontrèda te sala de consei del Comun de Sèn Jan, che la é stata en mercol passà e a chela che à tout pèrt l president de la Provinzia Maurizio Fugatti, l ombolt Giulio Florian, l procurador del Comun general de Fascia, Edoardo Felicetti, e vèlch raprejentant de la Jonta de Comun.

“Se trata de n intervent pervedù tel pian provinzièl per la uties da mont, spetà da trop te Fascia, che se met dant de mantegnir e stravardèr la calità de la èghes tel tegnir del Comun de Sèn Jan”, l à dit l president Fugatti. “Con chest lurier – l à dit amò apede – se à podù concèr ite vèlch problem che l era vegnù fora tel passà, e tel medemo temp arsegurèr i coleamenc de la Utia da mont Roda de Vael te la rei eletrica, tel bosserlait comunèl e te la fibra otica.
N intervent su na strutura n muie aprijièda da escursionisć e alpinisć te n lech da marevea e de nonzech descheche l é l Ciadenac te la Dolomites de Fascia, che podarà doventèr n model da tor su ence te de autra situazions de chesta sort a l'auta”.

Descheche l é stat dit, l projet l à abù n finanziament en dut de 1.984.600,00 euro, e de chisc 1.641.479,94 euro destiné apontin ai lurieres, enveze chel che vanza l é la sumes a la leta de l'aministrazion per fac no pervedui e etres agravies. L'opera l'à dat l met de durèr l medemo sćiavament per meter ju ence de etres sotservijes. Più avisa, apede la condota de la èga pazes, l é stat fat ence na neva condota per l bosserlait del Comun de Sèn Jan e l é stat enjignà i condoc per fèr passèr la linia eletrica (per lascèr ló de durèr i generatores a gaselech) e per meter ju la fibra otica. La fibra la sarà de emportanza fondamentèla tel davegnir per controlèr da dalonc la cabines dal eletrich.

"Se à serà su n lurier - l à recordà l ombolt Florian - che cognea vegnir fat. De gra a la colaborazion co la Provinzia, i lurieres i é stac fac dassen te curt temp, te presciapech sie meisc. A chesta vida ge dajon na responeta a la jent che rua te chisc lesc, na responeta concreta de servijes publics”.

Ence l procurador del Comun general de Fascia Felicetti l à palesà na gran sodesfazion e l à recordà che i lurieres i é stac fac te n lech olache de sajon rua tropa jent.

I lurieres i é stat fac da la firma Lago Rosso Soz. Coprativa, che l'à ciapà l apalt con n rebas del 4,814%, per na suma de contrat de 1.565.761,83 euro. L cantier l é stat avert ai 4 de oril de chest an.

Traduzion di Servijes Linguistics e Culturèi del Comun general de Fascia