Aproà l schem de cordanza che stabilesc la modalitèdes per meter a jir l projet “TINIA – Boletin meterologich per l Euregio”. L provediment l é stat aproà da la Jonta provinzièla aldò de la proponeta del president Maurizio Fugatti, che l à la medema encèria tel Grop Europeèn de Cooperazion Teritorièla (GECT) del Euregio Tirol-Sudtirol-Trentin.
L projet TINIA, metù a jir del 2019 a una anter la Provinzies autonomes de Trent e Busan dessema col istitut zentrèl de meterologia e geodinamica austriach, vel sporjer su n soul sit web – meteo.report – n servije de previjon del temp sorafora i confins e a una coi trei raions del Euregio.
“L é stat stabilì la ativitèdes, la modalitèdes de trasferiment e rendicontazion de la ressorses finanzièles che ge é stat dat su a la Provinzia e la partezipazion di membres del Euregio tel projet. La Provinzia autonoma de Trent la se tol su l coordenament del endrez e, l Servije Prevenzion risesc e zentrèla unica de emergenza, doventarà la strutura enciarièda che cognarà meter a jir chel che l é pervedù te la cordanza”, l à despiegà Fugatti. “La é dassen emportanta ence la colaborazion col projet ALBINIA, l boletin de la levines del Euregio: la colaborazion anter i gropes di doi projec la jirà inant ti egn che vegn, col dèr l met de aer na gestion più percacenta de la ressorses e la perferida de n servije de calità semper più auta”, l à dit avisa amò l president.