[Ladino] Nce chesta setemèna l é a la leta l nef apuntament de “Pedies”, rotocalch ladin de informazion, ruà a la puntata 472.
I argomenc de chesta setemèna l é: I utères restauré de la gejia de Dèlba. Per volontà del Grop de la Mèscres de Dèlba e Penìa, acà pec egn l é stat restaurà 2 utères del 1800, dediché a la Madona dai dolores e a Sèn Giosef. Inlouta i era stac fac su da doi joegn del paisc. L prof. Claus Soraperra l ne conta di autores e ence di desvalives aspec storics e artistics de chisc lurieres e apede ence de vèlch curiosità che nisciugn se recorda più; l’èrt de la filagrana l’à na gran tradizion tel raion Ampezan. La Presidenta de la Union di Ladins Elsa Zardini la ne aur i ujes del museo per veder da vejin la fineza e l’eleganza de chisc lurieres artistics. Chesta èrt, che anchecondì la é beleche jita fora, tel passà la caraterisèa duta la valèda d’Ampezo e la braura de si artejegn la era recognosciud te dut l Imper Austro-Ungarich. Chisc ornamenc preziousc aldidanché i pel vegnir amò amiré sul cef de la femenes, en particolèr la voies de arjent che sgalizea te anter i ciavei fac ite aldò de la tradizion che vel l guant da zacan; per la rubrica “Svampol ciatarul”, dedichèda a jent che fèsc jerveèr sie cunst, chesta puntata la porta dant Samuel Cincelli miec cognosciù desche DJ SAM. L è n joen da Poza co na gran pascion per la musica e l’eletronica. El, con gran capazità e braura, l é bon de meter ensema efec musicai n muie particolères e da grigner, ence col lurèr fora a na maniera duta sia paroles o frases per ladin e ence col readatèr musiches folk di egn passé te neva verscions reggae o tecno.