[Ladino] Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata n. 518. I argomenc che vegn portà dant te la puntata de chesta setemèna l é:
Edoardo Felicetti, Procurador del Comun General de Fascia, l ge fèsc i augures de bona festes a duta la jent de Fascia. Apede l porta dant i ejic de na scontrèda fata chisc dis passé, ence coi funzionères de la Provinzia, per fèr fora la costion de la viabilità te Fascia e Fiem per la setemènes de la olimpiades e paralimpiades con si evenc aldò, che più avisa i vegnarà metui a jir dai 6 ai 22 de firé e dai 6 ai 15 de mèrz del 2026. Segur la strèdes no les vegnarà serèdes, aboncont per smendrèr l trafich, ge vel ge conseièr ai ghesć de ruèr te Fascia per l Jouf de Ciareja o Pas de Sèn Pelegrin.
Alberta Rossi à portà dant sie nef liber per bec “Stella e la Regina delle Dolomiti”, na doucia contia che ge fèsc viver ai bec n ensomech anter la crepes. Steila, la picola protagonista che stèsc apede a la Reina de la Dolomites, monc corii de neif e vedudes zenza fin, la sperimentea aventures fates de ensomesc, amicizies e mingol de magia. Enceben che l rejone de Nadèl, l é n liber da lejer te cèsa dessema ai picioi dut l an, per tegnir su fora per duc i meisc i sentimenc che caraterisea l dezember: la marevea, la contenteza, l se voler ben e l se respetèr. Tel liber l é ence aprofondimenc sui lesc e i protagonisć, informazions de enteres per gregn e picioi, apede ai dessegnes de Gianluca Damiano.
Te la rubrica “Svampol ciatarul: jent che fèsc jerveèr sie cunst” sion jic a Selva a cognoscer Ewald Senoner, n artist zis foradeanter. Ewald l à metù ensema sacotanta miniatures da marevea per recordèr fac da zacan e entener miec coche la era con èrc e enjignes da n’outa. Te chesta pruma puntata l ne porta dant desvalives lurieres en cont del forment: coche se frelaa, se fajea farina e tinultima l lurier del pech per far pan.