[Ladino] Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata n. 507.
I argomenc che vegn portà dant te la puntata de chesta setemèna.
L cumià de Fascia per rengrazièr don Andrea Malfatti di 11 egn passé dessema. Na domenia de festa voluda da la 5 curazies de Soraga, Vich, Poza, Pera e Mazin per ge sporjer so salut e rengraziament. Per l’ocajion l era i raprejentanc istituzionèi, lies e gropes che i à volù tor pèrt a l’ultima zelebrazion de don Andrea te gejia de Sèn Jan olache, a la fin de la funzion, ge é stat sport i saluc e vèlch don. Per don Andrea pea via na piata neva de so mandat da curat; ma ence per la curazies de Fascia se averc n davegnir dut nef ajache ades sarà un preve demò per duta la 8 parochies, da Dèlba enfin a Soraga.
La Casermes de Sèn Jan dal 1912 a anchecondì. N projet de la Ciasa de Paussa e de la Majon di fascegn à portà a enrescir la longia storia di 6 fabricac che anchecondì l é doventà strutures al servije de la comunanza. Dut l é peà via da l’idea de ge fèr cognoscer a la jent la istoria de chisc ciasamenc nasciui en vea de la Gran Vera per ge dèr lèrga ai sudé. Anchecondì te chesta casermes à troà lèrga enc e servijes per noscia jent.: più avisa chiò troon l Museo ladin, l Comun General de Fascia, la Ciasa de Paussa, l’Azienda provinzièla di servijes sanitères, i Servijes sozio assistenzièi del Comun General. L frut de chesta enrescida l é stat metù fora sun totem loghé enlongia i desvalives frabicac, a na moda che duc posse lejer e cognoscer la storia de coche i é nasciui e de coche i é stac mudé tel temp.
Te la rubrica “Svampol ciatarul: jent che fèsc jerveèr sie cunst” porton dant l artist Armin Grunt da Ortijei: n autor de operes che trasmet forza, energia e sentiment fon. Armin l é n scultor dal talent grovech che l laora fora l len co la sia a motor fajan fegures entorcolèdes de gran efet e fazion.