Traduzione in ladino
Neves criteries per sostegnir la ativitèdes economiches ti lesc da mont
Anter la novitèdes smendrèr la distanza minimala anter ejercizies de multiservijes e la spersa minimala per ativitèdes de soministrazion
[Ladino] Con chela de sostegnir l comerz de paisc e fèr acioche la jent no se n vae da la valèdes più dalonc, la Jonta provinzièla l’à aproà na revijion emportanta di criteries per la conzescion de contribuc acioche vegne avert e mantegnù ativitèdes economiches ti lesc da mont del teritorie.
“Con chisc neves criteries volon tor ite più benefizières per poder ge dèr na responeta ai besegnes de la comunitèdes da mont, olache la ativitèdes economiches no les à demò na funzion comerzièla ma les é ence n servije teritorièl debesegn per la vita sozièla e per schivèr che la jent no se n vae da la valèdes più dalonc – la paroles del assessor provinzièl al comerz Roberto Failoni -. Meter a la leta contribuc più azessiboi e vardèr che vegne avert o mantegnù sul teritorie la boteighes e i ejercizies publics vel dir investir te la calità de la vita de nesc sentatins, col stravardèr la sozietà e l’economia de noscia valèdes”.
Anter la novitèdes prinzipèles che vegn ca da la deliberazion aproèda ai 23 de dezember dal esecutif provinzièl vegn metù al luster l smendrament da 3 a 2 chilometres de la distanza minimala anter ejercizies multiservijes, ge dajan l met de se emprevaler de chesta mesura ence a chela ativitèdes che timpruma no podea aer azes, col meter su na rei de chisc ejercizies slarièda fora sul teritorie, l smendrament de la spersa minimala de soministrazion per i ejercizies publics multiservijes e i bar da 50 a 40 metres cadrac, con chela de engaissèr a tor pèrt ence la ativitèdes più picoles, tor ju l diviet de localisazion di multiservijes ti lesc storics del comerz troé fora dai Comuns.
I neves criteries i vegnarà metui en doura col 1m de jené del 2025 per la ativitèdes multiservijes ordenères, enveze l criterie del smendrament de la distanza minimala l jirà en doura per i multiservijes SIEG (servijes de enteres economich generèl) a scomenzèr col 2026.
Traduzion di Servijes Linguistics e Culturèi del Comun general de Fascia
(cdt)
Immagini
