Di didaktik un formatìf vorlegom
Dòpo z’soina khent vornaügart, khearta bidar dar konkors “Dar Euregio macht schual” ’z mangda nemmen toal di klasse vo alln drai in Lentar, inngetoalt nå in djar, dürch da vornaügate didaktìk plattform online scuola.euregio.info.
Di schualn von Trentino mangse innschraim in progråmm “Dar Euregio bokhennt di schualn ”. Durch quiz un spiln, di klasse vodar viarte untarschual sin afta vünfte vodar obarschual, bartn mang khennen in Euregio in soi schualkhåmmar odar in setz von Euregio in Haus Moggioli ka Tria.Di kandidatùrn mang khemmen inngètt von 14 von herbestmånat sin an 15 von bimmat odar sin azta bart soin platz. Di trèff bartnse haltn hèrta di fintzta.
Azta di schualn vo almånko zboa Lentar leng au a Partnerschaft vor atz 30 von bintmånat mang inngem in vorsch z’soina darkhennt azpe “Schual Partnerschaft Euregio”. ’Schualdjar 2025/2026 di partnerschaft soin gekreschart vo sibane sin atz sintzane, un in gåntzan soinda khent inngevånk 35 schualn. Auz pan gåntz djar, di klasse vo alln drai in Lentar mang gian z’sega da interaktìf auzlegom von Euregio in Infopoint vo Innsbruck di studjént khemmen gevüart un machan an idealegen viazo in di zaitn. Darzuar in tème bodada sa soin – zbisnenen disan dar boletì von lavìn, dar Tour of the Alps, di glètschar, di gruam, di relidjong, un di Olimpiadi – barta soina sektziong vor di flüzz un pèch.
Dar Euregio vorst in studjént un soin famildje zo khenna di istitutziongen vodar Européan Uniong in soine djar schual, vor daz sèll di vortretom von Euregio Tiról-Südtiról-Trentino helft vor allz daz sèll boma bill bizzan vor an viazo atz Bruxelles. Darzuar lekkar au viazan gevüart ekspèrte vor di schualn, pitt disan viazan di studjént mang vorstìan pezzar di arbat gemacht von Euregio in Euròpa.
’Z soinda schualn boda soin starch gepuntet in Euregio: ulef schualn von Tiról, von Südtiról un von Trentino, defatte, håm augelekk di “Nètz Euregio von schualn vo agraria un hausbichtschaft” anvétze da tèknesche obarschual Marie Curie (FOS vo Merån), hatt augelekk “EUregio”, boda macht khennen di burtzan gelaich von drai Lentar, edukatziong tschivika, multilinguismus un kooperatziong.
Übarsetzt von Schaltarle vor di zung von Toalkamou vodar Zimbar Hoachebene
