Al event à tout pèrt, anter i etres, l president de Trentino Trasporti Diego Salvatore, l ombolt de Ciavaleis, apede a parlamentères e conseieres provinzièi, aministradores e raprejentanc del teritorie, de la forzes del orden e tecnics provinzièi.

En ocajion de l’inaudazion, l president de la Provinzia l à metù al luster coche la mobilità l è na pèrt strategica di investimenc leé a la Olimpiades e Paralimpiades, olache l Trentin l moscia la valuta de se enjignèr miec che la va per  l gran event. La Stazion Intermodèla de Ciavaleis, l à sotrissà, dessema coi intervenc de Penia a Canazei e Sèn Jan che i rua a n investiment total de 17 milions, l raprejenta n gran bel ejempie positif de chel che resta tel temp sul teritorie. La realisazion de n sistem de trasport publich modern, sostenìbol e de fazion, l à ence dit, l é funzionèl per miorèr la calità de la vita per la comunanza de la valèdes de la Veisc e i coleamenc co la Val del Adesc.

L president de Trentino Trasporti Diego Salvatore col rengrazièr duc chi che à fat pèrt del projet l à rejonà de n lurier strategich funzionèl  per smaorèr con mesi ecologics l trasport publich per l servije de la valèdes de la Veisc, enveze l ombolt de Ciavalei l à sotrissà l valor de l'infrastrutura per la connescion del teritorio e per n davegnir out a la sosteniboltà.

La neva Stazion Intermodèla la raprejenta coscita un di crouscdevia logistics de interscambie de la Val de Fiem. L intervent (import de 14.750.000 euro) l è vegnù gestì da Trentino Trasporti a una co la Provinzia autonoma de Trent e l Comun de Ciavaleis, su na spersa publica che i ge disc Prà dei Tini, comprèda da sozietà. Tel medemo temp, coi i ntervenc infrastruturèi, Provinzia e Trentino Trasporti i à investì a na vida emportanta ence sui mesi a rodes, l è vegnù comprà 30 corieres neves: 20 corieres a eletrich a zero emiscions e 10 corieres a metan “clan emiscions”.

L projet tel detai 
La Stazion Intermodèla de Ciavaleis la se svilupea su n loto de 6.939 metres cadrac, anter la Strèda Statala 48 de la Dolomites e strèda Paradisi, e la é caraterisèda da soluzions projetuèles che tegn cont de la sosteniboltà ambientèla.
La strutura la perveit l ofize per i biliec, sala da spetèr, impiant per lavèr i mesi e n depojit con n teac vert. L impiant l é coleà col telesciudament de Avisio Energìa, con n impiant da tulins da soreie da 25 kW e de n sistem per recuperèr l’ega de la pievia per lavèr i mesi. L teac vert l deida ence a smendrèr l impat per la vijion de la struttura tel contest urban e del paesaje.

Dut ensema l projet l perveit trei stazions infrastruturèles a servije del trasport publich local: apede a la neva Stazion Intermodèla de Ciavaleis, l vegn pervedù a Sen Jan de meter su l nef zenter logistich de Fascia, con piazal per la corieres e distributores per l metan, e ence amò aldò l garage, la berstot per la manutenzion e la infrastrutures per la cèria eletrica; ta Penìa, tinùltima, l é stat programà de smaorèr l garage atuèl, con doi pèrts neves e set colonines per la cèria de la corieres eletriches.

Traduzion di Servijes Linguistics e Culturèi del Comun general de Fascia