L video e la brochure é stac fac dai joegn del projet TAGLab, la berstot de auta formazion grafica del Istitut Pavonian Artigianelli per la Èrtes Grafiches de Trent che mena i studenc che se à tanche diplomà te n percors de enviament al lurier tras encèries reèles. Do na fasa de formazion teorica e pratica sul ciamp, i joegn à svelupà i doi prodoc informatives te n barat strent de confront coi tecnics del Partiment Gregn Carnivores del Servije Faunistich provinzièl, e i à tramudà i contegnui spezialistics te strumenc de divulgazion te n lengaz fresch, chièr e sorì.

L tutorial doura l lengaz del dessegn animà per despieghèr, te pech più che doi menuc, la regoles fondamentèles per meter ju e rencurèr coche carenea la sieves. La brochure tol ca i medemi contegnui e la sporc vèlch aprofondiment tecnich con na viesta chièra e sorida da vardèr fora. Chest material vegnarà dat fora ensema co la sieves eletrifichèdes sportes con conzescion de doura debant dal Corp forestèl del Trentin e l sarà a la leta ence online.

La scomenzadiva é nasciuda da la esperienza fata sul teritorie.
I controi fac ti ultimes egn à defat metù al luster che presciapech l 30% de la sieves eletrifichèdes palesa problemes leé a fai de instalazion o a na manutenzion nia dreta. 
Per chesta rejon l é stat cernù de dèr fora i aparac de prevenzion adum con strumenc informatives che deida a i durèr a na vida più scempia e dreta.

Vèrda l video-tutorial, la brochure e la testimonianzes di joegn grafics
> https://drive.google.com/drive/folders/10qvHplcceeYfkicleSSXW96a_7qgIW7E?usp=share_link

Traduzion di Servijes Linguistics e Culturèi del Comun general de Fascia