[Ladino] “L volontariat l é una de la esprescions più sćiantives de l’identità trentina e de noscia jent: aer a cher la comunanza, defat, vel dir ge dèr forza concreta a noscia Autonomia, che l à so fondament su na cultura de la responsablità e de la solidarietà che tel temp l à metù en pé de forc leames sozièi e comunanzes bones de ge fèr front a la endesfides più ries zenza lascèr endò nisciugn. Canche chest empegn l tocia i joegn, l doventa amò più emportant che l vegne recognosciù, perché ogne joen che l se dèsc ju col volontariat l viventea i valores che met a l luster i confins de noscia identità. L autogoeern no l é demò n prinzip istituzionèl, ma n empegn reèl e concret, testamonech de fèr pèrt del teritorie e de voler spartir dessema l davegnir”. Chesta l é stat la paroles del assessor provinzièl per la promozion de la cognoscenza de l’Autonomia Simone Marchiori, che l sporc so envit ai joegn e a la sociazions de volontariat a voler se meter en jech e a portèr dant sia esperienza en previjion del “Recognosciment per l volontariat di joegn - Glanzleistung prestazion de ezelenza". “Valorisèr voscia ativitèdes vel dir renforzèr noscia comunanza e l sentiment medemo de noscia Autonomia. L davegnir de l’Euregio no l pel vegnir fat demò co la politiches e la istituzions, ma ence co la partezipazion ativa di sentadins, soraldut di joegn. E l volontariat l é una de la formes più autes de zitadinanza ativa”, l sotrissea l assessor.