Giovedì, 22 Gennaio 2026 - 15:09 Comunicato 129

L argoment zentrèl de la scontrèda l é stat l Pian de la Informazion e la spartijon del Fondo provinzièl de la mendranzes linguistiches per l 2026

Conferenza de la mendranzes, Marchiori: “Na scontrèda per rejonèr del davegnir de noscia comunanza”

Traduzione in ladino

[Ladino] En mercol ai 21 de jené, domesdì via, te Sala Depero del Palaz senta de la Provinzia autonoma de Trent, se à dejout la XLI Conferenza de la Mendranzes, l organism che se bina e che se met a confront su la politiches per la popolazions de mendranza linguistica ladina, mochena e zimbra. L argoment zentrèl de la scontrèda l é stat l nef Pian de la Informazion e la spartijon de la quotes del Fondo provinzièl mendranzes per l 2026, estra che i neves criteries di ejames per l zertament e la valutazion de la cognoscenza del lengaz e de la cultura de mendranza e autra scomenzadives. L Assessor Provinzièl a la politiches per la cèsa, patrimonie, demanie e promozion de la cognoscenza de l’Autonomia, Simone Marchiori, à orì i liurieres e te sie intervent l à volù meter al luster l emportanza de chesta ocajion per binèr ensema, en prejenza, la Conferenza. “N moment de confront, de aprofondiment, de crescimonia e per se cognoscer, no demò tel enteres de la mendranzes linguistiches, ma de dut l teritorie, per rejonèr del davegnir de noscia comunanza: fondamentèl n moment de Autonomia”, à dit l assessor.

[ Foto Servizio Minoranze Linguistiche e Relazioni esterne]

À tout pèrt n muie de comembres, anter chisc l assessor regionèl a la promozion de la mendranzes linguistiches Luca Guglielmi, i raprejentanc istituzionèi di comuns e de la comunitèdes de mendranza, i raprejentanc di istituc culturèi ladin, mochen e zimber, i sorastanc de la istituzions scolastiches e formatives che laora sul teritorie, l President de la Union di Ladins de Fascia e l President de la Union Generèla di Ladins dla Dolomites. A chesta scontrèda à tout pèrt ence la dirigenta del Servije Mendranzes linguistiches e relazions esternes Elisabetta Sovilla.

Con referiment al Pian de la informazion de l’editoria, l program l perveit l sostegn a scomenzadives che favoresc l sparpagnament di lengac de mendranza ence sorafora la seides de sie teritories, da man di Istituc Culturai e del Comun General de Fascia. Anter chestes, la piates periodiches sui sfoes, i notizières de la setemèna, la trasmiscions radio e la produzions web e che vegn fora sui desvalives canai, i corsc per emparèr l lengaz e desvaliva autra ativitèdes editorièles e de comiunicazion che permet de smaorèr la perferida informativa, de smaorèr l numer de utenc e de miorèr la calità del lengaz de la informazions. Tel Fondo provinzièl per la tutela de la popolazions de mendranza l é presciapech a la leta 700 mile euro e l tol ite, estra che chisc intervenc de sostegn a la informazion tel lengaz de mendranza, intervenc metui a jir da la Provinzia, scomenzadives e projec de gran valuta per la tutela de la mendranzes linguistiches proponec da aministrazions locales, istituzions scolastiches e istituc culturai e l finanziament de la ativitèdes culturèles e de politica linguistica del Comun General de Fascia. Apede chisc vegn pervedù ressorses de enjonta per amò de etres desvalives empegnes, anter chisc la trasmiscions de ORF1 e ORF Sport che à desche obietif chel de ge arsegurèr a duc de poder veder canai de la televijion de lengaz todesch. A chesta vida sul Fondo l é a leta 900 mile euro en dut.

Anterite, te chesta scontrèda, l é stat envià via ence n confront en cont de vèlch mudament tel regolament che stabilesc i criteries e la modalitèdes per l zertament de la cognoscenza di lengac de mendranza e sia zertificazion, che passenea la modalitèdes di ejames aldò del standard QCER.

Fotoservije e filmat del Ofize Stampa

Chiò dawnload imagines e intervista.