U’ganommen der oa’neplan as paschraip der projekt “TINIA - Bètternochrichtn ver en Euregio”. De mosnemm ist kemmen u’ganommen va de Provinzaljunta derno va de vourtschbinn van president Maurizio Fugatti, as nimmp toal en Europeischegrupp va Lòntschòftzòmmòrbet  (GECT) van Euregio Tirol-Südtirol-Trentin.
Der projekt TINIA, augòngen en 2019 pet a zòmmòrbet zbischn de Autonome Provinzn va Trea’t ont Poazn ont s osterraiches zentralinstitut ver en bètternochrichtn ont ver en eartriarnse, billt versichern af na oa’zege websait - meteo.report - a dinst ver en bètternochrichtn ver òlla de lender van Euregio.
“S sai’ u’ganommen kemmen de òrbetn, de baitergemvirm ont de zeilnvirm van gèlt gem en de Provinz, ont de zòmmòrbet van toalnemmer van Euregio en projekt. De Autonome Provinz va Trea’t nimmp au s koordiniarn va de kontrollkommer, ont s Dinst van voursechen de problem ont va de Oa’zegenoatzentral bart sai’ de struktur as enviretrong bart de òrbetn as pet en oa’negea’ u’ganommen kemmen sai’”, hòt tsòk der president Fugatti. “Bichte barn sai’ de zòmmòrbetn pet en projekt ALBINIA aa, as ist s pericht van schneala’n van Euregio: de zòmmòrbet zbischn de zboa team van zboa projektn bart enviregea’ en de jarder as kemmen, asou as moglech sai’ barn a pessers regiar van mittln ont an gem a pessers qualitetdinst”, hòt nou tsòk der president.