Ufficio Stampa della Provincia autonoma di Trento

Martedì, 26 Maggio 2026 - 14:24 Comunicato 1589

’Z varlért von earst von prachant sin atz unundraitzekh von snitt. A maz zo geba kontra in sber khost vo benzina un dieslöl
Von 28 von madjo vort makma khoavan an abonamént vo 20 euro vor trène un korìarn: ma nempen pittar smart card

Traduzione in cimbro

[Cimbro] Von fintzta atz 28 von madjo vort makma khoavan afte di schaltarla vo Trentino Trasporti un Trenitalia in naüge summar abonamént vo 20 euro vor trene un korìarn boda bartn varlérn in gåntz Trentino. Dar abonamént heft å von earst von prachant un bart varlérn sin atz 31 von snitt afte statt autobus, afte korìarn, afte trène un afte kublpån Tria-Sardagna. Zo habanen izta mångl zo haba a smart card aftz soin nåm vor di trentinar öffentleschen traspòrte, vor arbatar un pensionètt. Berda nonet hatt di kart makse vorsan garade in di gelaichegen schaltarla: ’z bartnda soin mångl lai a drai tang zo habase.
Ditza maz iz khent ågenump vodar provintziàl Djunta vorgelekk von vorzitzar Maurizio Fugatti zo geba kontra in sber khost von benzine un dieslöl. “An oportunitét vor di pürgar – vor arbatar un pensionétt untar di 70 djar boda nèt håm in dianst gratis – in disa zait boda benzine un diselöl khostn hèrta mearar, mangsa håm a konvenientega tarìff zo mövrase pinn öffentleschen traspòrte. An abonamént boda bart duràrn vor drai månat, von prachant sin in snitt, a konkrètega hilfe vor berdase mocht mövarn in Trentino, übarhaup vor arbat ma nèt lai. A hilfe vor di famildje un vor berda sa nützt di meze, boda mage håm bidrùmm an toal von sèll boz hatt sa gezert vor in abonamént vor sèks månat odar vor a djar” ditza hatta khött dar Fugatti.
Autobus nell'Alto Garda [ Trentino Trasporti SpA]

Da untar bia un baz.

Azpe da iz geschribet obar dar abonamént mage khemmen gekhoaft afte schaltarla vo Trentino Trasporti un Trenitalia Spa åhevante von 28 von madjo 2026 vort un bart soin gètt in laüt boda håm aftz soin nåm di kart “arbatar un åndre” odar hèrta aftz soin nåm di kart “pensionètt” (Kategorian A, B un D).

Disar bildjétt mage khemmen genützt aftz: 

  • Bus un tråm vodar statt un auz vo Trentino trasporti SpA
  • Aisanpån Trento-Malè-Marilleva
  • Aisanpån vodar Valsugåna vo Tria sin atz Primolån
  • Aisanpån von Prènnar (auz baz IC, EC, Frecce) zbisnen  Borghetto un Mezzocorona/Ora (di statziong vo Ora mage khemmen genützt lai zo giana dena zuar in teldar vo Fiemme un Fassa; ma mage ne ausitzan, ne abesitzan in di statziongen vo Salùrn,  Margreid, Kurtatsch un Neumarkt)
  • Kublpån Tria- Sardagna

Berda nèt hatt sa di smart card makse vorsan inngebante soin formulàr (ma vennten online o) hèrta afte schaltarla vo Trentino trasporti un Trenitalia; Di kart bart khemmen gètt in a drai tang un khostet viar euro (darzuar in 20 euro vor in abonamént vor di drai månat).

Di djunta hatt o auzgemacht bia zo geba bidrùmm ’z gèlt. Berda sa hatt an abonamént vor sèks månat odar vor daz gåntz djar boda dekht in summar o, bart vången bidrùmm in proportziong, ’z iz genumma aztaa di zboa abonaméntn  nèt lengse ummadar übar in åndar vor mearar baz 30 tang. Anvètze khinta nicht gètt bidrùmm in sèlln boda håm an abonamént vor a boch odar an månat, saiz vor di statt saiz vor auz.

Bia un baz zo vorsa å zo haba bidrùmm ’z gèlt bart khemmen geschribet vor atz 10 von prachant afte istitutzionàln websaitn vodar Provìntz un vo Trentino Trasporti. 

Übarsetzt von Schaltarle vor di zung von Toalkamou vodar Zimbar Hoachebene

(cdt)

Fonte: Ufficio Stampa

Versione Stampabile

Immagini

Visualizza

Potrebbero interessarti: