A plattform übar di grentzan boda gitt vèrt in djungen
Dar Rat von djungen gitt a Plattform boda zuargitt alln in djungen zo maga nemmen toal in sèll boda khint auzgemacht von organe vo EUSALP un sichart azta alle di idee un daz sèll bosa pensàrn khemm gehaltet guat. Di toalnemmar lengse untar vürzovüra politike un prodjèkte vor di Alpm vürlegante konkrètege prodjèkte un initziatìvan, machante khennen soine idee in politike von State un von redjongen vo EUSALP un schupfanse zo halta kunt von soine spetzifegen rècht a livèll européo. Di djungen lirnen zo nemma toal in demokratege protzèss, konfrontarantese pitt åndre zungen un kultùrn. EUSALP sèlbart, lirnt von djungen un nimp au hèrta naügarne idee von sèlln boda inan tage bartn lem in alpinar raum.
Dar Rat vinntze viar odar vünf vert aniaglan mandàtt durch virtuàl struméntn in tematege khnöpf vürzovüara konkrètege arbatn. Di djungen boda au soin, lengse untar vor a mobilitét boma mage auhaltn, lengse pittnåndar pitt åndre initziatìvan hèrta auglekk vo djunge, arbatn aftaz sèll bomen mage impaitn von alpinar redjongen un machan khennen in naturàl un kulturàl schatz von Alpm.

Kandidatùrn sin atz  12 von madjo 2026
Di kandidatùrn gian inngètt durch in portàl EUSALP . Dar Rat bill machan übarleng aftz bia dar alpinar raum iz nèt hèrta gelaich vor alle, vor daz sèll bartma süachan zo zornira pitt sinn di toalnemmar zbisnen in simm Lentar vo EUSALP, zo sichra azta alle di redjongen håm soin vortretar un asó bartma o süachan aztada sai saiz puam azpe diarnen.
Di State un di redjongen vo EUSALP, bartn auhaltn bazta khint gezert von toalnemmar vor di viazan zo nemma toal in trèff un bartn gem soi hilfe vor allz daz sèll boda bart soin mångl. Zo bizzasan mearar: https://alpine-region.eu/alpine-youth .

EUSALP (EU Strategy for the Alpine Region) iz a stratedjì makroredjonàl augelekk ’z djar 2015 von européan Rat zo sterchra di mittarbat übar di grentzan un interredjonàl in alpinar raum, zo rispundra in khempf boda paitn alle genoatn.
Vo EUSALP soinda toal simm State: vünf toalnemmar vodar EU (Beleschlånt, Taütschlånt, Österraich un Slovenja,) un zboa auz vodar EU (Svaitz, un Liechtenstein) in gåntzan 48 redjongen darzuar in zboa Provintzan vo Tria un Poatzan.
Di stratedjì iz da sèll zo nütza di naturàln un kulturàln schètz in modo azza mang soin augehaltet un darzuar zo pinta di lentar vo pèrge, zo maganen zuargian destrar aulegante aktziogen bodase vüarn vürsnen un bodase machan krescharn 
Åndre informatziongen atz https://alpine-region.eu/ .

Gekhluppet: dar plakàtt

Übarsetzt von Schaltarle vor di zung von Toalkamou vodar Zimbar Hoachebene