Venerdì, 24 Gennaio 2025 - 13:43 Comunicato 122

Traduzione in mòcheno
Va de Tolgamoa’schòft an ecografo ver Villa Rosa

Der strument bart versichern ver vinf to as de boch de offetzait van  ecografischekrònkendinst 

[Mòcheno] Der radiologische krònkendinst van riabilitativ spitol va Persn der Villa Rosa bart meing hom an nain ecografo va de naieste generazion, gèltsgott en birkle bèrt gaschenk va de Tolgamoa’schòft Hoa Valzegu’ ont Bersntol ont van an paitrog va de Fondazion va de Pònk va de Hoa Valzegu’. Der nai ecografo bart gem de moglechkait za hòltn offet vinf to as de boch der krònkendinst va radiologi van spitol, versichern de pauchecografi ont de muskl-skeletrische, de vaskularn studium ont as de molètn saitn ver de sèlln as schoa’ sai’ en Villa Rosa, ober ver de sèlln va aus aa. En de innbaich van ecografo hom toalganommen der iberòllviarer va de Apss Antonio Ferro, de viarerer van radiologische Dipartiment Luisa Ventura, der viarer van riabilitativ spitol Villa Rosa Jacopo Bonavita, der viarer va de Operativunitet va radiologi va Trea’t Mauro Ferrari,  der president va de Tolgamoa’schòft Hoa Valzegu’ ont Bersntol Andrea Fontanari ont der president va de Pònk va de Hoa Valzegu’ Franco Senesi.

Der nai ecografo – as kostet 47tausnt euro - ist an multidisciplinar ultrasuoni drau galeik asn an karett as versichert an hoachen livell va òrbet, en de glaichekait van standard van dinstn va radiologi van spitelder; der bart kemmen praucht iberhaup ver de pauch ecografi ont muskl skeletrische, de vaskularn studium ont as de moletn saitn.

«Der doi hèrze zoach - hòt derklort der iberòll viarer Ferro - mòcht sechen abia as stòrch sai’ s klòffen se ont de zòmmòrbet zbischn de istituzionen ont de lokal gamoa’schòftn, as hòt verstònnen de bichtekait za prauchen s gèlt zan peistn. Der nai strument bart gem de moglechkait en de radiologi za verpessern de qualitet va de untersuach ont asou kennen kuriarn pahenn ont guat de lait van Hoa Valzegu’, asou za verpessern de zaitn ont de mittln».

De viarer van Dipartiment va radiologi Luisa Ventura hòt padonkt de gèltgeber:  «Dena zait mei ber prauchen an birkle guatn ecografo as bart gem de moglechkait za gem omport en de zuntneat van lait van plòtz ont en de kronken van Villa Rosa. S doi bart ens gem de moglechkait za tea’ au de òrbet van  ecografischekrònkendinst en de lait as va aus kemmen ont asou kirzern de liste van lait as bòrtn. Benn as ber barn meing òrbetn bar ber kennen versichern mear abia hundert ecografi as de boch, gèltsgott en de hèrze hilf va de dokteren Antoniol as no steat en krònkendinst».   

Za unterstraichen de moglechkaitn  van nai plunder pet en rif za verpessern de bòrtlistn, ist der viarer van Operativbèrk va radiologi va Trea’t Mauro Ferrari aa gaben: “Gèltsgott en de groashèrzegkait va de Tolgamoa’schòft ont va de Pònk Hoa Valzegu’ hom ber an ecografo va hoaha gamma as ens gem bart de moglechkait za versterchern de qualitet ont de quantitet va de untersuachòrbet. Ber barn guat sai’ za versichern de operativitet van radiologese krònkendinst  ver vinf ta en de boch ont ber barn gem kennen pessera dinstn avn lònt ont en de krònken va Villa Rosa”.

Der president va de Tolgamoa’schòft Hoa Valzegu’ ont Bersntol Andrea Fontanari hòt turchgamòcht de momentn as trong hom za schenken der ecografo, “a naikait u’pfònk va unten as konkret kemmen ist gèltsgott en de sinergi zbischn de innrichtn as gaòrbetet hom”. Van president va de Pònk Hoa Valzegu’ Franco Senesi, sai’ de grias va de Fondazion va de Pònk kemmen, as va òlbe ver en zòmmlem òrbetet zòmm pet de lokaln vraibellegen ont de vraischòftn.

Ibersetz gamòcht van Sprochtirl va de Tolgamoa'schòft Hoa Valzegu' ont Bersntol

(cdt)


Immagini