Di auzlegom
Haür soinz vüchtzekh djar azta iz khent ågenump dar Zboate Statùtt vodar autonomì un di auzlegom “Di Provìntz kontartze” hergerichtet vodar Stiftung Museo Storico del Trentino, hatt azpe zill zo “kontara” di stòrdja, in presént un di zukunft vodar Istitutziong: autonome Provìntz vo Tria. Di auzlegom iz inngetoalt pitt mearare postatziongen un instaltziongen, un vinntze aftn augehevate piåno von setz in Dånte Platz, åhevante von haup intritt un vür sin kadar vorkhåmmar Winkler.
“Di Provìntz kontartze” iz a prodjèkt offe un boda khint hèrta vornaügart un lekk vür pinn soin instalatziongen mearare zung auzdrukh gebante asó berda geat z’sega an oportunitét zo macha abe vüchtzekh djar stòrdja vodar autonomì nå in naüng kompetentzan boda soin khent zuargètt pinn Zboate Statùtt von djar 1972.
An earstn di auzlegom zoaget nå un nå alle di tritt boda soin khent gemacht in ditza halbe djarhundart stòrdja, un darzuar soinda di grafike boda soin nützlich zo vorstian bia dar provintziàl sistèm iz gekhreschart pittar zait. Zentràl punkt vodar auzlegom un von kontàrn soinz di börtar von laüt, baibar un månnen, boda håm gearbatet in Provìntz odar in di åndarn öffentleschen emtar un sektör boda machan in sistèm. Asó khinta auz a mosaik vo stòrdje vo aniaglaz bodase pintn pittar stòrdja vo alln un pittar sèlln vodar istitutziong, un bart soin möglich vorstìan ’z gehöarase toal vo eppaz, un di pintom dar arbat boda dise laüt håm un dena allz daz sèll boda in di djar iz gebèkslt. Augelekk azpe a profìl vo Istagram, di auzlegom mage soin gesek aftz disan social network o. An ende, a duppla stèllung iz hergerichtet in di  Saal Depero
Di auzlegom mage khemmen gesek von menta sin an vraita vo di 9 sin di 12 un vo di 14 sin di 17. Da edukatìf area vodar Stiftung Museo storico del Trentino, vüart di laüt z’segase.

Di instalatziongen
Dèllant dar auzlegom, von 5 von herbestmånat un sin atz 31 kristmånat 2022 zo vaira di vüchtzekh djar von Statùtt soinda khent gemacht sött “A” azpe autonomia boda bartn khemmen gelekk in haup inntret vodar Provìntz un vodar redjong in Platz Dånte un in bege Manci, boda iz dar setz vodar vorsitzarung von provintziàl Rat un von bege Torre verde boda iz dar setz von Lånt autonomì Rat.
Åhevante von earst von herbestmånat bartna khemmen gelaüchteget pittnan zigl roatn liacht di slözz Thun, Stenico un Beseno un dar venetziå pontesöl  von Kastèll von Buonconsiglio, bart khemmen offegetånt un bartma mang auzgian åna zo mocha zaln vor in gåntz tage von 5 herbestmånat.

Da gekhluppet di grafìk

Übarsetzt von Schaltarle vor di zung von Toalkamou vodar Zimbar Hoachebene
(Traduzione a cura dello Sportello linguistico della Magnifica Comunità degli Altipiani Cimbri)