Giovedì, 06 Agosto 2026 - 14:29 Comunicato 2300

Ades co la roda se pel jir da Molina fin ta Cianacei. Fugatti: “Servije per la comunanza e sie ghesć”

Strèda per jir a pe e co la rodes de Fiem e Fascia, l coleament fin ta Penia l é fenì

Traduzione in ladino

[Ladino] La strèda per jir a pe e co la rodes de Fiem e Fascia la é fata e fenida. Co la inaudazion del nef toch da Fontanac (Ciampedel) a Penia (Cianacei), ades se pel jir en segureza co la roda sun passa 48 chilometres, da Molina fin tinsom Fascia. Na opera spetèda èrs, che enjonta n nef toch ai passa 500 chilometres de la rei de la strèdes de la rodes del Trentin, sun cheles che demò del 2025 l é passà più che 3 milions de jent. La inaudazion la é stata en jebia ai 30 de messèl olache à tout pèrt l President de la Provinzia autonoma de Trent Maurizio Fugatti, l Procurador del Comun General de Fascia Edoardo Felicetti, i ombolc de Cianacei Giovanni Bernard, de Ciampedel Alessandro Bernard e de Mazin Fausto Castelnuovo, estra che l assessor regionèl Luca Guglielmi e l president de Federciclismo del Trentin Renato Beber. À tout pèrt ence l projetist de l’opera Sergio Deromedis (sorastant del Servije gestion strèdes), l diretor del Ofize Infrastrutures de la strèdes per jir a pe e co la roda Giovanni Maiello e l sorastant del servije per l sostegn a la ocupazion e la valorisazion ambientèla Maurizio Mezzanotte.
“Con chest toch de strèda che ades aon fenì, aon fat n vèrech inant envers n obietif amò più gran: fèr su na rei de la stèdes per jir a pe e co rodes che la é bona de meter adum noscia valèdes. L coleament anter Fascia e Fiem l vegn metù ite te n projet più gran che ge vèrda al davegnir, che l é out a slarièr fora i coleamenc scin sul Garda e te la Vallagarina, che ge darà l nonzech al Trentin de teritorie che favoresc la mobilità co la roda. Bèsta demò pissèr che de gra a la bike lane se pel ruèr en segureza sui jouves de Pordoi e Sela. Chest intevent l à n valor emportant per l turism e per l sport: se trata de na opera outa ence al davegnir e che verteea l Trentin ai evenc di Mondièi de ziclism del 2031”.

Ciclovia delle Valli di Fiemme e Fassa: inaugurazione ultimo tratto [ Archivio Ufficio stampa PAT]

L intervent, metù a jir dal Servije operes de la strèdes e de la ferates de la Provinzia tras l ofize infrastrutures de la strèdes per jir a pe e co la roda, à portà a realisèr l coleament anter Fontanac e Penia, fenian la Strèda de la rodes provinzièla de Fiem e Fascia (CV-TN05). L nef toch, lonch presciapech 6,5 chilometres, smaora l percors da 41,7 a 48,3 cholometres e coleea ite e ite i paijes de Fontanac, Ciampedel, Cianacei, Dèlba e Penia.

Per l’opera l é stat inevestì 2,14 milions de euro en dut. Del projet se à cruzià l enj. Sergio Deromedis co la colaborazion del geometer Francesco Weber, enveze l responsabol del prozediment l é stat l enj. Carlo Benigni. I lurieres i é stac fac da la firmes Rauzi e Ghiaia Brenta e en subapalt da Misconel.

L’opera la ge respon a doi besegnes. Da na man vegn smaorà la perferida del turism co la roda de una de la arees del Trentin olache rua più jent, descheche desmostra i beleche 220mile passajes registré tel 2025 dal dombrador de rodes logà a Pera; da l’autra la sporc na neva infrastrutura per la mobilità sostegnibola de duc i dis, durèda semper de più ence per se spostèr da cèsa e jir a scola o a lurèr de gra a na doura semper maora de la rodes a eletrich.

L percors l é soraldut da la man a dreta de la Veisc, col preferir percorsc dediché e segures e passan fora o passan demò enlongia ai paijes per arsegurèr servijes e coleamenc percacenc. L é stat ence tegnù cont n muie de la calità del paesaje del intervent, co la doura de materièi naturèi e del post, desche l lèrsc durà per la sparangoles di neves ponc sul ruf de Duron e de Antermont.

Estra che la neva strèda per jir a pe e co la rodes, i lurieres à revardà ence l comedament de operes de enjonta, neves traversamenc levé te paisc per smaorèer la segureza di utenc e la realisazion, te l’area sportiva de Gries, de n nef ciamp da balon.

Fenir su chest coleament l é de joament ence per la sajon da d’invern. Con chest nef percors sarà più sorì endrezèr l portoi de la Marcialonga ajache no se cognarà più enjignèr soluzions provisories e, canche sa mont i portoes per la rodes i sarà seré, se podarà durèr chesta strèda ence per l paslonch.

Desćèria l service filmac > https://drive.google.com/drive/folders/1qshR9Xi6zMppRUBehbtdDxNLKlA1EAnN?usp=sharing