![](/var/002/storage/images/media/immagini-comunicati-stampa/festival-gioventu-euregio-san-martino-in-badia-ottobre2023-image/3692552-1-ita-IT/Festival-Gioventu-Euregio-San-Martino-in-Badia-ottobre2023_imagefullwide.jpg)
Co na discuscion dintornvia l davegnir del Euregio Tirol-Sudtirol-Trentin e la scontrèda col assessor per la Formazion e la Cultura ladina tel Istitut Cultural Ladin Micurá de Rü a San Martin de Tor se à serà su l Festival di Joegn del Euregio 2023. Endèna la scontrèda col assessor i joegn i à portà dant sie pensier col definir l event n moment da gaissa e na bona ocajion per fèr amicizies sorafora la seides e passèr via la dificoltèdes linguistiches. L Festival de la Joentù del Euregio 2023 l é scomenzà en mercol ai 4 de otober tel Istitut Ladin Micurà de Rü a San Martin de Tor olache l diretor Jürgen Runggaldier l à portà dant sia atività.
Al luster l plurilinguism, la cultura e l turism
I argomenc prinzipèi de la doudejeijema edizion del festival de chest an i é stac l plurilinguism, la cultura e l turism. 36 studenc anter i 16 e i 19 egn che i fèsc pèrt di trei raions del Euregio Tirol-Sudtirol-Trentin, te chisc cater dis de festival te Badia i à abù l met de se fèr n pensier dintornvia l lengaz, la cultura e la storia de la jent ladina. N moment spezièl, per chi che à tout pèrt, l é stat l cors intensif de ladin.
Ti dis do l é stat endrezà workshop con artisć te Museo ladin "Ciastel de Tor" che i joegn à podù veder, compagné da la diretora Katharina Moling, e ence momenc de discuscion con Dennis Dorigo, diretor del Istitut culturèl ladin "Cesa De Jan", dintornvia la spartijon de la Ladinia stata acà i cent egn.
Vijites a musees e scontrèdes con jent del mond del sport
Endèna i cater dis del Festival de la Joentù l é stat ence endrezà na vijita compagnèda al Museo de la Gran Vera “Tre Sassi” sun Jouf Valparola e al Museo defora sul spiz de Lagació. No l é stat demò rejonà de lengaz e cultura ma bensegur ence de turism: endèna l moment “Evenc sportives e turism te Badia” i joegn e la joenes i à podù scontrèr persones de nonzech del mond del sport e del turism, e i à abù ence ocajion de “curiosèr” daite del hotel La Villa.
L Festival del Euregio l à garatà
Da acà 12 egn l Festival del Euregio bina adum joegn anter i 16 e i 19 egn che vegn dai trei raions del Euregio col mot “Fèr su adum l Euregio”. Tel 2014 l Festival de la Joentù l à ciapà da l’Union Europeèna l pest GECT "Building Europe Across Borders ", per l secondo post.
Traduzion di Servijes Linguistics e Culturèi del Comun general de Fascia