Der president va de Autonome Provinz va Poazn hòt padònkt der vourder president van Euregio ver de guat zòmmòrbet gamòcht en de leistn zboa jor ont ver de sai’ òrbet. Pet en zil “gea’ iber de grenzn” geat òlbe envire de mittòrbet unter de sudtiroleren president. En programm s hòt za vongen u’ naia projektn ver za verglaimern de region pet de sai’na lait, ver za zòmm mòchen plaim de lait ont ver za gea’ iber de grenzn. Zan earstn, de zòmmòrbet ver en glaiche zil as schauk en de europa ont iberhaup en de lait as sai’ en Euregio. S sèlberenvire gea’ ver en social, ecologichen ont en birtschòft plaip an rifpunkt mear bichte en de kurz zait za tea’; schaung ver an Euregio as giltet an glaiche projekt pet de burzn en gschichte van Tirol: ver en nai president s ist an projekt ver de lait ont nèt ver de politik.
Der capitan van Tirol hòt padònkt der sai’ glaiche trentiner ont vourder president van Euregio ver de guat zòmmòrbet bail de zboa jor va de sai’ presidenz, der hòt mear vert keing as sai’ kemmen trong envire dinger schoa’ vourgamòcht ont u’pfonkt va naia. S ist kemmen klòfft van projektn gamòcht abia der Campus van Euregio ka Innsbruck, en schual konkurs “Euregio mòcht schual” ont en EuregioLab, as hòt vourtrong vourtschbinnen ver de energi en Forum va de europa va Alpbach. De òrbetn ont de projektn zòmmgamòcht hèlven de lait za verglaimern se va peada de saitn van Prenner ont der Südtirol bart meing en doi vurm versterchern se mear en de cooperazion.
Bail de vria, der vourder president hòt derstellt en de Junta de òrbetn van Euregio en 2023. S ist kemmen u’ganòmmen der programm va òrbet ver en 2024. De zboa jor 2021-2023 iaz verpai sai’ gaben zoacht pet en spruch “Der Euregio ist jung”, an slogan as hòt gabellt lein en zentrum van vill projektn ont iniziativen vourtschbunnen, òlbe de jungen, de nain generazionen ver za versterchern der Euregio ont s sai’ glaim en de lait van drai lander. Pet en bècksl va de presidenz van Trentin en Südtirol, der Euregio geat envire za pakimmern se ver de zboa jor as barn kemmen va ziln va haitzegento: s bècksln van bètter ont s pakimmern se en sèll as de lait prauchen, van suachen òrbeter as studiart sai’ en glaichmèsskait sozial, va de glaichen meglechkaitn en regiar van bòltpahalter ont en de groasn vlaischvrèsser. A’ne vergèssn de zòmmòrbet pet de Zivil schutz, pet de kulturomtn, imprenditornòrbetn, turismus ont sport.
Der vourder sakretare hòt gadenkt as der doi to ist nèt lai der rif van a stuck va de gschicht van trentin ober aa s u’vong van a stuck va gschicht ver de Autonome Provinz va Poazn. Der hòt nou kein as der ist vroa gaben van zboa jor gamòcht ont iberhaup ver de leistn mu’netn as hom trong en riven van an schouber òrbetn. En nai president kimmp galòck an bichtegen pahalter as hòt gamòcht kennen der Euregio òlbe mear jung. De òrbetn as barn kemmen gamòcht barn kemmen u’pfonkt pet a guata zòmmòrbet ver za hom glaicha riven zbischn de lander.
S hòt gagriast de toalnemmer en de Junta ont en trèff der pirgermoaster va Molveno aa. Nomitto, nem en sea s ist kemmen gamòcht a manovra van junga allievi ont van learer van Vraibellega Pompiarn va Mezzolombardo, der doi to hòt se garift aa pet en liad en balsch ont taitsch van Inno alla Gioia, der inno va de Union va de europa va de schualern va de earste schual “Luigi Nicolussi” va Molveno as ist va de IC va Mezzolombardo, an zoach va de kamaròttechkait iber de grenz as ist va de Euroregion finz va benn as de ist augòngen.
Letratn ont film notschauk van Druckomt
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
