Ver de 18 jor as gamòcht kimmp, haier de 28 kinder sai’ drinn en bersntolerisch ver zboa bochen
Pet en teater der “Summer club” as bersntolerisch ist raicher
Traduzione in mòcheno
[Mòcheno] Der “Summer club”, de rai va summertrèffen as bersntolerisch as s Bersntoler Kulturinstitut envirtrok ont as haier ver en 18e jor gamòcht kimmp, ist voll va sòchen za tea’. Derno van a boch as gaben ist za kennen s Tol, en de doi zboatege boch hòts a teaterbèrk as bersntolerisch.
Òchtontzboa’sk kinder en de elt va de earsteschual en de vouder boch hom gameicht kennen eirter ont bundern van sai’ lònt, pfiart ont gaholven van an ettlena mitòrbeteren. S holzbèrk, der agritur, de sog, s lesn, de manovern ver en zivilschutz, sai’ lai an ettlena van dinger as se as an spilereschn vurm gameicht hom mitmòchen, gor divertirn se ont iberhaup prauchen s bersntolerisch. An to, benn as kemmen sai’ aa an grupp va kindr va de glaiche elt va Lusérn, hom sa gameicht mòchen de spil van a vòrt ont pasuachen de Gruab va Hardimbl.
De naiekett va haier ist a gònza boch as derzua galeikt kemmen ist ver za stelln zòmm pet an eksperten a teaterstickl. En vraita s stickl aus de gschicht “Der schmi’ va Rumpltol” kimmp vourstellt en òlla.
Tea’ eppas zòmm derbail as men untersuacht en sai’ lònt ont s sèll as s kònnt u’piatn en summer, ist eppas as runt guat geat ver za prauchen ont za learnen s bersntolerisch. Za hom de mitòrbeter ont de lait as en plòtz as viarn der kindergrupp ist eppas as ver sei runt guat geat. Benn as se aa nèt kennen de sproch as en glaiche livell, za tea’ asou hom se de meglechkett za pruachen sa en kontekstn as sai’ zan mearestn glaim en sai’ lem van òll to. Derzua, meing sechen direkt abia as gatu’ kemmen a toal òrbetn abia za paun pet en holz oder za kochen a toal òlta èssrezeptn, hilft runt ver za learnen pesser de richtegen beirter, de sèlln as zuakearn. Der teater ist dòra runt guat ver za mòchen direkt òrbetn de kinder as asou kennen prauchen s bersntolerisch ver za lòng schaung en òlla s stickl as se galearnt hom. Der interèss van kinder ont der sai’ naturalet bunder hom zoakt as de iniziatif ist bichte ver de jungen generazionen za gem bèrt en de sproch ont asou kemmen ozolt de organisazionòrbet van Institut ont va de sozial- cooperativa AM.IC.A. ont de gèlder ausgem va de Autonome Provinz va Trea’t.
Ibersetz van Bersntoler Kulturinstitut
(lt)
Immagini
