[Ladino] Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata n. 511.
I argomenc che vegn portà dant te la puntata de chesta setemèna l é:
N projet de barat e colaborazion anter la Berstot Ensema de Ciampedel e la Scola Enaip de Tieser desche ocajion de crescimonia per duc.
En mèrtesc ai 4 de november a Ciampedel, aló da la senta de la Tislerai Ensema de la coprativa Oltre, l é stat portà dant na scontrèda e na marena anter i utenc de chesta sociazion e i studenc del istitut ENAIP de Tieser. Na sort de fradaa olache i bec de chesta doi realtèdes che laora sul teritorie, i à abù l met de se troèr, e tel cojinèr adum, se baratèr esperienzes e idees tel spirit de l’acolienza, de l’inclujion e de la dreta valorisazion de ogneun.
La Union Generèla di Ladins dla Dolomites l’à n President nef: più avisa Roland Verra.
Acà n meis, te la radunanza de la Union Generèla dai 10 de otober, i raprejentanc de la Unions de valèda e de la comunanza ladina da Busan i é stac chiamé a litèr l president nef.
Aldò de la litazion, l é vegnù fora belimpont Roland Verra. Verra l é na personalità n muie cognosciuda te la Ladinia; l é scritor e poet, l se à dat ju trop co la cossa ladina e anter l auter l à corì l’encèria da Intendent de la scoles dal 1992 al 2018. Co la redazion de Pedies sion jic a se fèr contèr.
Te la rubrica de aprofondiment “Zebicher, per veder più davejin”: Ve conton del Ciastel Stetteneck de Ortijei: n ciastel nominà te la conties de Karl Felix Wolf e che se pissèa oramai desfantà tel jir de la storia. Alincontra acà 25 egn, de gra a la enrescides di studiousc Herwig Prinoth e Stefan Planker, l é sutà fora la ruines sun Col da Pincan. Anter storia e contìa donca, ve conteron de chest ciastel e de so patron l cavalier Stetteneck che i raprejenta na piata de gran valuta per la storia de Ortijei e de duta Gherdena.