[Ladino] Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata n. 522. I argomenc che vegn portà dant te la puntata de chesta setemèna l é:
Ai 21 de jené l é stat chiamà ite a Trent la Conferenza de la mendranzes del Trentin. Al orden del di l era l Pian anuèl de l’informazion, la spartijion de la ressorse metudes a la leta da la Provinzia per la mendranzes e la revijion di ejames de ladin, mochen o zimber per l patentin.
Col projet “Piste azzurre” da 20 egn en ca vegn endrezà arcedamenc de campions de schi de nonzech a livel internazionèl te noscia val. N projet che fèsc cognoscer nosc raion e ge dèsc luster a Fascia, olache ti meisc che vegn vegnarà endrezà garejèdes de schi e de ski cross de copa del mond.
Te la rubrica de aprofondiment “Zebicher, per veder più davejin” se à desleà l carnascèr te Fascia. Ai 17 de jené, da Sènt Antone da la ciampaneles, aldò de la tradizion l é temp de carnascèr, chest an na ocajion per pontèr via con n nef projet. L grop de la mèscres de Dèlba e Penìa, con autres 10 gropes da duta la dolomites, l Istitut Cultural Ladin majon di fascegn e a cef l Museo de la Mascherèdes Dolomitiches de Belun i à metù a jir n percors per mantegnir viva chesta tradizion e per la fèr doventèr patrimonie imaterièl UNESCO. La dì la é stata averta col forum de la rei de la mascherèdes arcaiches per n moment de confront e tor su i sentimenc più fons de chesta tradizion veiora.