[Ladino] Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata n. 517. I argomenc che vegn portà dant te la puntata de chesta setemèna l é:
La neva telecabina de Ciampedel la aur ofizialmenter i ujes. Do 2 egn de lurieres l nef impiant portamont anter i più inovatives e tecnologics de duta la Èlpes, l é vertech e l tol l post de la veia forenadoa che l’à regnà 40 egn.
L é n impiant dut nef, l prum de chesta sort te la Tèlia; n sistem a cabines vidà da aparac con tecnologies e tecniches inovatives. La gran neva l é la capazità de portèda de la jent; l é stat calcolà che se passarà da 900 persones a l’ora a 2.200 e chest l permetarà de smendrèr debel l dejèje de la gran coudes, sibie dadoman per jir en su, che ence da sera per vegnir deretorn. L investiment l é dassen gran, più avisa entorn i 60 milions de euro: na operazion che aboncont, apede al inom de Ciampedel, la porta luster e nonzech ence a duta Fascia.
I augures de don Mario Bravin a duta la comunanza de Fascia. Descheche se sa, da chest uton en ca don Mario l é l curat de duta la parochies de la val, da Soraga a Penìa. En vea de la festes ormai vejines donca, nosc piovan l ne porta dant n pensier sul Nadèl, olache l ne recorda che enceben che sarà dis de gran lurier e segur aron duc n muie da fèr, l è semper de valuta se recordèr di valores leé al stèr dessema, al stèr coi più picioi e co la persones soules, se binèr con chi de cèsa e se fèr i augures.
L ne recorda ence che zacan la cripela la vegnia fata te stua, belimpont per tor dant l bambin tel post più emportant de duta la cèsa.
La conditora Asia Corradi, che ja da vèlch an en cà la laora per l Hotel Dolomia de Soraga, la ne porta dant la rezeta de n douc per da Nadèl coi perfumes de la festes. Più avisa: i brownie a la ciocolata, con toron, mandarin e zabaion.
E con chest douc ence la Redazion de Pedies la ge sport i augures de Bon Nadèl e Bona Festes a duc si spetadores.