A La Pli de Mareo, via per chisc dis passé, l é stat spilenà “Franzi”, la neva opereta populèra ladina, scrita da Iaco Rigo e metuda en musega da Alex Trebo. La raprejentazion portèda sun paladina la porta dant al publich na storia fata de fortuna, tentazions e domanes atuèles che condizionea i valores de la vita e de l’amicizia. N spetacol che fèsc pissèr do l raport anter i scioldi, i enteresc personèi, i leames e i raporc co la persones. L é ence amò da dir che per meter enesema chesta raprejentazion à lurà adum atores profescionisć dessema coi amatores e ence chest l é stat na desmostrazion de voler spartir dessema na bela esperienza.

L’Union generèla di ladins dla Dolomites la met endò a jir l Ladiniatour, più avisa l conzert dedicà a la musega moderna ladina. Dai 2 ai 4 de otober a Urtijei, a Cianacei e a la Ila, musizisć ladins i portarà sun paladina sia cianties neves, toc enjigné per ge dèr sbunf a la cianties fates tel bel lengaz de la mère. Per se enjignèr a chest event la redazion de Pedies la vel portèr dant e fèr cognoscer a si spetadores i desvalives gropes, i ciantarins e la ciantarines de la trei valèdes ladines che tolarà pèrt a chesta neva edizion. Te chesta puntata jon a cognoscer la ciantarina da la Ila Ines Tavella.

Per l report de aprofondiment “Zebicher” de chesta puntata, ve porton dant la mont de Sèn Pelegrin e de sia pastures. N’outa chesta l’era la mont de la jent da Moena olache la jia a se fèr l fegn da mont e a monteèr l bestiam.
Anchecondì l é doventà soraldut n bel raion da schi ma, coche ne conta l Simon Chiocchetti – Janac, che l fèsc l pèster de la vaces sun Campagnacia, ence amò ades chiò vegn monteà no tant de chi da chiò ma de n grop de bachegn del Südtirol. Simon l ne conta de so lurier e de coche la é nascoida e cresciuda chesta sort de fradaa. Veder l bestiam che pascolea sui pré da mont l raprejenta amò anchecondì l spieie de l’identità storica e culturèla de la jent da chiò.  

I reports de chesta setemèna i é stac enjigné e porté dant da Annarita Lollo, Angela Pederiva e Riccardo Zanoner.

Metù a jir col sostegn del Comun General de Fascia, de la Provinzia autonoma de Trent e de la Region autonoma Trentin – Südtirol, “Pedies” l va fora su Trentino Tv – canal 10 Prov. de TN - vigni sabeda da les 18.00 (sie da sera), de domenia da les 13.30 (mesa la does domesdì) e de lunesc da les 11.30 (mesa les doudesc). 

L program l va fora ence su AltoAdige TV – canal 11 Prov. de BZ - vigni domenia da les 18.00 (sie da sera).

Se pel veder duta la puntates ence sul canal YouTube de TV Ladina sot chest link:
https://www.youtube.com/@TvLadina

La puntata de chesta setemèna la vegnarà fora entorn la medema ora de la televijion.

Se pel veder i report un a un su la piata Facebook de TV Ladina.
https://www.facebook.com/TelevijionLadina

Traduzion di Servijes Linguistics e Culturèi del Comun general de Fascia