L Ladiniatour, l event de musega moderna con cianties per ladin, l é ruà ence a Cianacei con 6 gropes e musizisć ladins che à portà sun paladina si toc per ge dèr sbunf a la musega per nosc bel lengaz. I à ence ciantà dessema “I sun l’umanité”, la cianzon neva per ladin scrita da Georg Mussner, che rejona de umanità e union anter la persones. Con paroles per ladin fascian, gherdener e badiot l autor l à volù slarièr fora n messaje de gran emportanza: vigni un l é preziuous, vigni un l é na pèrt de l’umanità, e vigni un con so esser cogn fèr sia pèrt per jir sorafora la desferenzes e la reijes per crear adum zeche da bel per l davegnir.

La seconda pèrt de l’intervista del President de l’APT de Fascia Fausto Lorenz, che l ne conta de turism de anchecondì e davegnir. L é stat uzà fora che l turism domana sinergies sul teritorie, ge vel meter ensema i ponc de forza, meter al luster la ezelenzes più percacentes per uzèr fora la potenzialitedes de noscia val sul marcià semper più globalisà.

I vejins de la frazions de Cianacei e Dèlba i à lità n statut nef per n model nef de aministrazion del derit de vejinanza. Ti ultimes egn la gestion de l’aministrazion publica, con più vincoi e burocrazia, la vegn ferèda, per chesta rejons la frazions de Cianacei e Dèlba, jà acà valch an, les à scomenzà n percors per mudèr si sistem aministratif e passèr dal model tradizionèl de la ASUC a chel che vegn dit ben comun. Per chest enstadì i à chiamà ite duc i capifech per litèr e dezider democraticamenter chest mudament.

Te val Badia la cultura ladina la passa ence da la cojina. Anter raides e cooking class, la scomenzadives Nos Ladins e Spëisa Ladina fèsc cognoscer e tegn su la tradizions, percheche la tradizions no les é demò ti musees o ti libres de storia, ma ence te la rezetes. “Nos Ladins” na picola raida e la cooking class, col chef Davide Crazzarola olache i partezipanc à emparà a enjignèr n piat de la tradizion ladina e “Spëisa Ladina” a La Val olache ingredienc scempies, rezete de ciasa e saeres veiores i vegn passé da na generazion a l’autra.

I reports de chesta setemèna i é stac enjigné e porté dant da Doris Valentini, Annarita Lollo e Riccardo Zanoner. 

Metù a jir col sostegn del Comun General de Fascia, de la Provinzia autonoma de Trent e de la Region autonoma Trentin – Südtirol, “Pedies” l va fora su Trentino Tv – canal 10 Prov. de TN - vigni sabeda da les 18.00 (sie da sera), de domenia da les 13.30 (mesa la does domesdì) e de lunesc da les 11.30 (mesa les doudesc). 

L program l va fora ence su AltoAdige TV – canal 11 Prov. de BZ - vigni domenia da les 18.00 (sie da sera).

Se pel veder duta la puntates ence sul canal YouTube de TV Ladina sot chest link:
https://www.youtube.com/@TvLadina

La puntata de chesta setemèna la vegnarà fora entorn la medema ora de la televijion.

Se pel veder i report un a un su la piata Facebook de TV Ladina.
https://www.facebook.com/TelevijionLadina

Traduzion di Servijes Linguistics e Culturèi del Comun general de Fascia