Di trasmisiongen vo ORF gian zo opfra no eppaz mearar von sèll bodada sa iz.
’Z iz a vürlegom boda geat zo legase darzuar in lokàln televisiongen, boda sa ren übar tème boda soin starch nützlich vor in Trentino, augehaltet von Dianst vor di Zungmindarhaitn  un auzantn sachandarn azpe ekonòmesche djeneràl dianst. Di initziatìf, darzuar helft zo macha khennen da taütsch zung, da österraichege realtét un allz bazta ågeat dar taütschan bèlt.

Est izta khent gemacht a konventziong zbisnen Redjong, GECT un da österraichege televisiong ORF zo lazza seng in da gåntz Redjong un in Euregio, durch Ras (Radiotelevisione Azienda Speciale) di nachrichten un di dokumentardje gemacht vo ORF (österraichege radiotelevisiong) boda ågian in Trentino.  Zbisnen in ziln von  GECT izta daz sèll zo zoaga azpe ’z hatt z’soina un daz mearaste boma mage dise televisìf progrémm – übarhaup durch televisiongen bodada soin sidar vil zait in di lentar un von öffentleschen – zoa azta khmmen gelirnt pezzar di zungen, di kultùrn un di khennezaichan, darzuar pittnar stercharne ekonomesche un sotzial pintom von Euregio. Allz ummaz sin haüt, di konventziong hatt nèt gemak khemmen gåntz gehaltet guat un di trasmisiongen soin khent gezoaget lai in an toal vodar Provìntz.

Ankunto dar mittarbat pitt Trentino Digitale, da provintziàl vüarom hatt kontratàrt zo sterchra in senjàl (5 Mbit/s in gåntzan) zoa azta di trasmisiongen mang khemmen gesek azpe ’z hatt z’soina in da gåntz Provìntz in sèll toal von Kamòu vo Palai o (Area Lenzi) boda pellar nèt iz gest gedekht.  
Disa vürlegom iz khent augehaltet vo alln in di Konferéntz vor di zungmindarhaitn ombrómm di iz khent gehaltet stratègesch. Dar dianst iz khent zuargètt zo macha dar gesèllschaft EI Towers da uantzege boda arbatet  vor aso baz in Trentino.

Di nümmar von kanél  - 75 vor ORF 1 un 76 vor ORF Sport – soin khent zuargètt von Minister von Firme un von Made in Italy pittn dekrèt von vorgånnate 9 von prachant.

Übarsetzt von Schaltarle vor di zung von Toalkamou vodar Zimbar Hoachebene