Traduzione in cimbro
Naüge kritèrdje zoa auzohalta di bichtschaft afte pèrng
Zbisnen in naüng sachandarn vürgelekk, mindar baitom zbisnen in geschèft un håm mångl mindrar minimàl platz vor berda auzgitt z’èzza un zo trinkha
[Cimbro] Pinn zil auzohalta di geschèft von lentar un zoa azta di laüt nèt gian vort von lentar vort bait vodar statt, da provintziàl Djunta hatt ågenump naüge bichtege kritèrdje zuarzogeba schütz boda mang helvan auzolega bichschaftege ativitét un dena zo machase stian vor långa zait in di lentar von pèrng.
“Pitt disan naüng kritèrdje böllbar gèm zuar in meararne laüt zo maga håm an schütz asó gloabar zo giana inkéng in sèll boda håm mångl di kamöüschaftn von pèrng, bar bizzan ke in dise lentar di bichtschaftege ativitét håm nèt lai an håndl vèrt ma ’z soinz plètz boda di laüt mangse vennen un, azta soin offe di geschèft iz iantrar azta dise laüt stian zo leba in di lentar un gian nèt vort – dise soinz di börtar von provintzial asesór vor in håndl Roberto Failoni – gem zuar zo haba destrar di schütz un schupfan zo tüana offe odar zo halta offe di geschèft billz soin gemuant pezzarn di qualitét von lem un darhaltn in sotzial un bichtschaftege stoff von ünsarn teldar”.
Zbisnen in naüng sachandarn inngevüart vodar delibera ågenump atz 23 von kristmånat vodar provintziàl Djunta gedenkhma ke ’z izta khent gemindart da minimàl baitom zbisnen in a geschèft un daz åndar, von drai kilòmetre azpe ’z iz gest sin haüt, izze khent getrakk atz zboa, asó håmda rècht zo haba di schütz di sèlln geschèft boda sin haüt håmzan nèt gehatt rècht o, un ditza gitt zuar zo haba a fölkrana nètz geschèft in di lentar, darzuar izta khent gemindart dar minimàl platz vor berda auzgitt z’èzza un zo trinkha boda iz pasàrt vo 50 atz 40 mètre quadre, ’z zil iz daz sèll zo halta offe di khlumman birthaüsar o, darzuar izta khent vorgenump dar verbot affezotüana geschèft in di stòregen plètz darkhennt von Kamöündar.
Di naüng kritèrdje bartn gian in vigór von earst von hoachnach 2025 vor di normàln geschèft, anvétze vor bazta ågeat da minimàl baitom vor di geschèft SIEG (servizi di interesse economico generale) lai von djar 2026.
Übarsetzt von Schaltarle vor di zung von Toalkamou vodar Zimbar Hoachebene
(cdt)
Immagini
