I lurieres, finanzié con na suma en dut de 580.458 euro, i à l obietif de adatèr la strèda acioche posse passèr ence mesi gregn, e che se posse tor demez l diviet e no ge vobie ogne outa fèr deroghes percheche i posse passèr se l é besegn. L projet – desche prezisà dal enj. Massimiliano Tatti, de l’Agenzia provinzièla per la operes publiches (Apop) – l perveit de slarièr l’utèda, che l’arà n rai mesan de 6 metres, col ciavèr sunsora la strèda e fèr su na neva fondazion de sostegn su micropèi sotite strèda. I lurieres i vegnarà lascé su de november per la paussa da d’invern e i scomenzarà da nef chest’aisciuda che vegn.

Per l Ombolt de San Giovanni di Fassa – Sèn Jan, Giulio Florian, se trata de “n projet restà te crigna tropes egn che zacan l vegn metù a jir de gra a la Jonta Fugatti”. “Se trata – l à dit amò apede – de na opera de gran emportanza per nosc raion: zacan dajon na responeta concreta a n problem de vibilità dassen senester per l coleament co la Val de Vaiolet, Ciampedie e la viles de Ronch e Muncion”.

A veder l cantier l era ence l Procurador del Comun General de Fascia, Edoardo Felicetti, la Vizeprocuradora, Lara Battisti, e l conseier provinzièl Luca Guglielmi. 

“L intervent – l’à spezificà Battisti – l é spetà èrs da passa vint egn da la jent de Muncion. Anchecondì l é gran limitazions per l passaje di mesi gregn, con dificoltà per l reforniment de la uties e empedimenc tel svilup del paisc. 
Col slarièr e meter en segureza la strèda zacan sarà possibol arsegurèr n passaje più sorì e segur a duc i mesi, ence via per d’invern.”

L Conseier Guglielmi l à palesà sia sodesfazion per chesta opera e l à sotrissà che l intervent l era “n empegn che aee tout su te la legislatura passèda e che l vegn concretisà de gra al finanziament de la Jonta provinzièla per ge dèr na responeta concreta ai sentadins de Muncion e ai ghesć che passa per chesta area”.

Desćèria chiò l service video

Traduzion di Servijes Linguistics e Culturèi del Comun general de Fascia