Traduzione in ladino
L Zenter de paslonch de Lago de Tieser l doventa impiant sportif de gran emportanza
Chest vegn stabilì da la delibera de la Jonta provinzièla metuda en doura en vender ai 13 de dezember
[Ladino] L Stadie de paslonch de Tieser l doventa impiant sportif de gran emportanza.
N zil arjont de grà ai lurieres de miorament che vegn fat te chisc meisc per poder fèr la garejèdes de la Olimpiades e Paralimpiades tel 2026 e zertificà co la delibera de la Jonta provinzièla aldò de la proponeta de la vizepresidenta e assessora al sport Francesca Gerosa. “L impiant de Tieser – à dit la vizepresidenta Gerosa – l é do che l vegn renovà e, canche sarà fenì i lurieres, chest sarà n zenter sportif modern, co la tecnologies più neves, avert a duc e, do che vegnarà fat la garejèdes de la Olimpiades e Paralimpiades, sarà una de la miora strutures olache se podarà endrezèr garejèdes a livel nazionèl e internazionèl. N vantaje per dut l sport trentin e per duc nesc atlec e sportives che podarà fèr sport te n impiant moder e con duc i comfort a la leta”.
L Zenter de paslonch de Tieser l vegn jontà ite te la lingia di impianc de nonzech recognosciui da la Jonta provinzièla, apede al Ice Rink de Piné e al trampolin de saut coi schi Giuseppe del Ben de Pardac jà ite dal 2019.
Aldò di investimenc fac, che i miorarà l impiant a livel struturèl e tecnologich, la strutura la vegn recognosciuda da la federazions de sport desche zenter de enters per i arcedamenc e garejèdes da man de la squadres nazionèles, dal 2025 l zenter de sport de lago de Tieser sarà donca n impiant de sport de gran emportanza. Aldò de la lege provinzièla del 2016 sul sport, l zenter l podarà ciapèr, per la gestion, ence didamenc da man de la Privinzia.
Traduzion di Servijes Linguistics e Culturèi del Comun general de Fascia
(cdt)
Immagini
