’Z hatta genump toal in trèff di diridjénten von Dianst vor di zungmindarhaitn in européan audit vodar provìntz boda hatt gedenkht alle di initziativan boda bartn khemmen vürgetrakk vodar Provìntz auz pa djar, zbisnen disan auzgem in di obarschualn ’z puach abezolirna di pürgar "Minoranze e società inclusiva", gemacht pittnåndar pittar Universitét vo Tria, boda untarstraicht in vèrt un bazza bölln muanen di Zungmindarhaitn in ünsarne lentar. auz pa djar 2023 barta o khemmen vürgelekk abezolirna di maistre boda lirnen in di schualn boda soin di taütschan zungmindarhaitn, ditza dòpo azta iz khent getånt daz gelaichege vor di ladinar un darzuar naüge trèff von “Ren pinn Zungmindarhaitn”.

In di Konferéntz izta khent gezoaget biavl gèlt ’z izta aftn Font vor di Zungmindarhaitn vorz djar 2023 ke ’z iz mearar baz 738 tausankh euro. Ditza gèlt bart khemmen genützt vor bichtege prodjèkte zo schütza di zungmindarhaitn, prodjèkte boda khemmen vürgelekk von lånt vüarom, von schualn, un von kulturinstitütt un garade vodar provìntz, un no von Plån vor di linguistìk un kulturàl politika von  Comun General de Fascia, darzuar in Plån vor di informatziong. Di vorsåmmelung hatt ågenump bia ditza gèlt iz khent auzgetoalt.

Nå in sèll boda auzmacht daz provintziàl gesetz, di pürgar boda gehöarn in fölk von zungmindarhaitn håm rècht zo haba informatziongen saiz geschribet saiz durch televisiong in di zung vo aniaglana kamòschaft. ’Z zil iz daz sèll azta di zung vodar mindarhait khemm genützt in lem vo alle tage, in famildja un auz gebantar vèrt un machantese höarn. Ma süacht o zo pezzra bazta khint getånt übar dar informatziong, redante vo hèrta mearar argoméntn, pittnar zung hèrta mearar raich asó schupftma di laüt zo nützase iantrar auz von haus o. Darzuar bartma süachan azta di zung von mindarhaitn khemm genützt hèrta mearar pinn naüng tèknolodjìan un in di media, ditza zoa azta di zung khemm genützt von djungen o. ’Z gèlt untargelekk vor in Plån vor di Informatziong iz in gåntzan vo mearar baz 430 tausankh euro.

Foto von Prèss Åmt

Übarsetzt von Schaltarle vor di zung von Toalkamou vodar Zimbar Hoachebene