La cianties neves les cognarà esser consegnèdes dant dai 30 de jugn, duran l form endrezà aldò, a la leta sul sit del Istitut Cultural Ladin (www.istladin.net).

D’uton l projet se serarà su con n conzert – event finèl en domenia ai 8 de november 2026 da les 5 da sera, ló dal Teater Navalge de Moena, olache duc i cores e la formazions de oujes che à tout pèrt a la scomenzadiva, i sarà envié a ciantèr dal vif la ciantia che i à portà dant. 

Apede a la region Autonoma Trentin – Sudtirol che à sostegnù dut l projet TrasLaMusega, chesta ultima pèrt dedichèda ai cores l’à podù se emprevaler ence del prezious didament del Comun de Moena e del Comun General de Fascia.

I protagonisć del projet TrasLaMusega se à binà a una te n grop de lurier che se à pissà de più scomenzadives che se ouc a targets desvalives. Tel jir de doi egn, chesta l é la terza proponeta del projet che se conzentra sui cores e su la formazions de oujes per smaorèr l repertorie de cianties per fascian.

La oujes ciantarines de Fascia, che se dèsc ju tant tel ciamp liturgich di cores da gejia, che te chel profan e da spas di gropes polifonics e di cores da mont, podarà portèr dant neva cianties a più oujes, con o zenza compagnament de strumenc.

Endèna l event ai 8 de november te Teater Navalge l publich te sala l ge darà la stima a la mior compojizion e vegnarà menzionà ence i tesć neves de maor valuta.

L Comun General de Fascia l à recognosciù l empegn di cores al ben de la valorisazion del lengaz ladin tel chèder del “Pian organich de politica linguistica e culturèla”.

La partidures completes e i tesć de la cianties neves i sarà metui a la leta di cores e de duc i enteressé sul sit de la Mediateca Ladina, per ge dèr amò più luster.

De autra enformazions sun chesta scomenzadiva se pel les troèr sul sit del Istitut Cultural Ladin, su la piata https://www.istladin.net/ld/e/141   

Traduzion di Servijes Linguistics del Istitut Cultural Ladin de Fascia