L president de l’Euregio e del Sudtirol Arno Kompatscher à comentà: “Anché scomenzon via n nef capitol per la previjions meteo de na region storica, crean n valor enjontà per duc chi che vif, laora e passa sie temp ledech te l’Euregio. La mapa co la previjions del temp dèsc l met de recognoscer l’Euregio ence dal pont de veduda geografich”.
A la fin de la fasa de sperimentazion, finanzièda dal program Interreg de la UE col inom TINIA, l projet l ge é stat delegà a la Provinzia autonoma de Trent, a sie Dipartiment Protezion zivila, bosć e besties, che coordenea i lurieres. L Trentin con gran gust à dat sie contribut con sia esperienza e con ressorses, à dit amò l president de la Provinzia autonoma de Trent Maurizio Fugatti: “Chest dèsc l met de aer azes ence tel Sudtirol e tel Tirol a la previjions fates tel Trentin a livel comunèl”, à sotrissà.
Informazions che podarà aer duc chi che à de besegn de dac meteo prezisc, à sotrissà l president del Tirol Anton Mattle: “Bèsta pissèr beledemò a la atività de la protezion zivila e a sie ejic per la segureza de la jent, per l’agricoltura e per l turism”.
I detaes de Meteo Euregio i é stac porté dant dai referenc del grop de lurier: Erica Cova de Meteotrentino e i responsaboi di Ofizies e di Servijes competenc, Bruno Bevilacqua, sorastant del Servije prevenzion risesc e zentrèla unica de emergenza PAT per l Trentin, Michela Manuari per l Sudtirol e Klaus Niedertscheider per l Tirol. Su la piata internet l é a la leta ence la previjions del temp sa mont con informazions a desvaliva quotes dai 1.500 ai 3000 metres e se pel aer azes ai dac de la stazions meteorologiches e la imagines de la webcam loghèdes sul teritorie en temp reèl.
L record de Monte Maria: osservazions meteo dal 1856
I religiousc de l’Abazia de Monte Maria i nota su temperatura, pievies e livel de la neif scin dal 1856. Se trata di documenc meteo ufizièi più veies de dut l Tirol storich de lengaz todesch. Père Anselm Krieg e Günther Geier (Ofize Meteorologia e prevenzion levines) peissa che duta chesta mesurazions de dut l’Euregio toutes su de seghit les é dassen fondamentèles, anter l auter, per la ensescides sul clima.
L bolatin meteo de l’Euregio l é a la leta on line per ingleis (meteo.report ), todesch (meteo.report/de ) e talian (meteo.report/it ) e su la piata web del Euregio . La neva previjions meteo, descheche aon dit, les sarà integrèdes sul sit meteo de la Provinzia de Busan e sun Meteotrentino .
Fotoservije del Ofize Stampa
Imagines de l’Euregio
Download imagines e intervistes chiò: https://drive.google.com/drive/folders/14waTG3mYlLU3s_ZQlbwZneUpQ1gAd2ZY?usp=sharing
Traduzion di Servijes Linguistics e Culturèi del Comun general de Fascia
