“Bèkslante bazta håm mångl di laüt, bèkslta bazta khint gevorst in firmen un dar eknomì o. Vor ditza iz bichte schützan di vornaügarung un di nåsüach. Lai asó makma pensàrn zo giana vürsnen garècht in di djar boda khemmen. Vor disan motif, biar vodar Håndlskhåmmar vo Poatzan pittnåndar pittar Håndlskhåmmar von Tiról un pittar   Håndlskhåmmar vo Tria sidar ettlane djar halpar ua garadege prodjèkte nåzosüacha un zo süacha naüge beng drinn in Euregio un leng untar ’z gèlt boda iz mångl vor in Prais Euregio vor di djungen nåsüachar un in Prais Euregio vor di vornaügarung” asó hatta khött dar Ebner.

“Bar håm mångl vonar hoatra stratedjì zo kreschra boda lekk panåndar, vornaügarung, auhalthait un didjitalizatziong, auznützante ünsarne redjonaln hauppünkt. Dar Euregio iz dar ünsar  multiplikator vor ditza” hatta khött darzuar dar Thaler.

Dar nummar rèkord vo kandidatür vor di Euregio Awards vo haür khüttaz biavl dise prais soin gehaltet dakunt un darzuar zoaget o di qualitét vodar nåsüach in ünsarne redjongen. Di tang vo  Alpbach soin a guata okasiong zo macha khennen in talént von ünsarn djungen nåsüachar un z’zoaga inovatìf idee boda, azza khemmen augehaltet azpe ’z hatt z’soina, mang vüarn zo macha prodjèkte boda trang guatz vor in gåntz Euregio. Lai schützante di djungen un auhaltante di bizzschaft barpar mang auleng a kompetititf, ratzionàl zuarkhemmane boda mage soin augehaltet” hatta khött dar De Zordo.

Prais Djunge nåsüachar
Zbisenen in sèks finalìstn vodar vürtzrane editziong von Prais Euregio vor djunge nåsüachar, di trentinaren Eva Casotti vodar Universitét vo Innsbruck hatt gebunnt in earst prais. Aftn zboate platz izta gerift di Elena Fogazzi vodar Universitét vo tria, dar draite platz, anvétze, iz vodar Julia Hoffmann
Vodar Universitét vo Innsbruck.

“Pitt naüge idee, tèknolodjìan un stratedjìan di nåsüach helft nèt lai zo sterchra in bizzschaftege zentrum ma di gitt zuar zo pezzra starch di ekonomì o. Dar prodjèkt boda hatt gebunnt un alle di sèlln boda soin gest finalìstn gem zuar bia bichte ’z izta di arbat nåzosüacha boda khint vürgetrakk alle tage in Euregio”, asó hatta khött di vorsitzaren vodar djurì un rèktören vodar frai Universitét vo Poatzan Ulrike Tappeiner.

Dar Prais Euregio vor djunge nåsüachar hatt drau 5.000 euro vor in earst, 2.500 vor in zboate un 1.000 vor in draite prodjèkt klasifikàrt. Haür håmda inngètt soi kandidatùr 46 nåsüachar boda håm mindar baz 35 djar, boda lem in di lentar von Euregio Tiról-Südtiról-Trentino odar boda arbatn in an nåsüach institùt von Euregio. Di arbatn mang soin ågånt in mearare bizzschaftege dizsiplìn un tratàrn djeneràl sachandarn übar da artifitziàl intelegentz, ètische questiongen odar aministratìf, odar sektöt azpe di mobilitét, di instrutziong un di hilfe in laüt.

Prais vornaügarung
Dar Prais Euregio vor di vornaügarung iz khent zuargètt dar tirolar firma “RevIVe Medtech GmbH”,  aftn zboate platz izta gerift di firma vo Rovrait “B2 Labtech” un draite di firma “wiegon
GmbH” vo  Landeck.

“Di prodjèkte boda håm gebunnt zoang ke di firme von Euregio soin guat nèt lai zo halta au da internatzional konkoréntz ma da soin insinamai guat zo bèkslase nå in sèll bosa tüan se sèlbart” ditza hatta khött dar vorsitzar vodar djurì un vüarar von Standortagentur Tirol, Marcus Hofer.

Da soin gest 54 di firme boda håm soin setz in Euregio bodase soin kandidàrt in Prais Euregio vor di vornaügarung zoagante sachandarn, dianst odar aplikatziongen vor da artfitziàl inteligentz vor se sèlbart odar vor soine klientn. Di drai prodjèkte boda håm gebunnt håm gevånk 10.000, 5.000 un 2.000 euro.

Da gekhluppet alle di finalìstn von Euregio Awards un khurtz di prodjèkte bosa håm inngètt.

Foto un pildar von Prèss Åmt PAT, EFA un Euregio

Download von pildar un interviste da

Übarsetzt von Schaltarle vor di zung von Toalkamou vodar Zimbar Hoachebene