Traduzione in mòcheno
En de suach van pèrgòrbetn zòmm pet EUSALP
Nemmen toal en "Discover Mountain Jobs edizion 2025: Bòlt ont de òrbetbèrkn van holz” de vrong miasn tschickt kemmen vour de 31 van heibeger
[Mòcheno] Discover Mountain Jobs ist an summer kamp va EUSALP as noschauk en bòlt ont en de òrbetbèrkn van holz offet en de jungen as hom zbischn de 18 ont de 26 jor. Haier ist der Trentin as innlont de toalnemmer tscherlt, an zòmmtrèff as tauert drai to en Rontschai’ ont ka Tesero va de 18 as de 20 van leistagest 2025.
Der zòmmtrèff ist organisiart van Òrbetgrupp 3 (AG 3) va EUSALP “Òrbetmòrk, schualbèrk ont learbèrk” - koordiniart va de Autonome Provinz va Trea’t - ont zuazolt van Projekt Support EUSALP (FESR, turch der Programm Interreg Alpineplòtz). De doi òrbet mòcht toal va de prioritet AG 3 “Jungen ont òrbet”, bou der bichteste zil ist der sèll za lòng kennen de pèrgòrbetn en de jungen ont de moglechkaitn va òrbet en de Alpn, asou as kemmen galep de pèrgplatz ont asou kimmps derhòltn der kulturalpahalter van doin lander.
De toalnemmer barn hom de moglechkait za vertiaven s aigene bissn pet auskenneta lait en de sektorn van balder, van vicherlòntschòft, van unternemer ont va de suach van holz, pet pasuachen asn plòtz ont en de lokalnbèrkn, asou za kennen sèll as de Alpn kennen gem. De platz vrai sai’ zboa’sk ober vouraus barn sa kemmen tschèrlt. Men miast schicken de vrong vour de 31 van heibeger 2025 asn doi link: https://forms.gle/pnmAZHiZLoMGnkmU6 .
De toalnemmer barn se vinnen en de Villa Flora en Rontschai’. S èssn ont s schloven sai’ galuckt van Programm. A toal roasnkostn barn kemmen zaruckgem. Der programm bart sai’ as balsch ont as englisch.
Ver de nochrichtn: eusalp.labourandeducation@provincia.tn.it
Derzua: plakat
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
(cdt)
Immagini
