Holz ont stoa’ sai’ de materialn as men praucht ver za paun de heff van pèrng: sai’ dinger as men vinnt asn lònt ont as de kemmen praucht en de haiser van pèrg ont as mòchen ònderst ausschaung de lòntschòft van Bersntol.
Van hoff, as ist zan mearestn gamòcht van doin materialn, klòfft men en de zbaite edizion 2025 van workshop “Heff ont aussicht va pèrg: s innbende ont s ausbende van hoff”, van TSM-STEP Schual ver za regiarn de eirter ont de aussicht, ver de technike as òrbetn, auskennetn lait, de hòntbèrker, òllgamoa’regiarer ont schualer van Enaip, pet de rif za vertiavern a toal dinger ver en aupaun ont ver de aussicht van heff, verpuntn en de òrbetn va ausrichtn van doin haiser innbende ont ausbende.
Ungefèr sèsk toalnemmer as mòchen toal va de vourtschbinn, men plaip a ker en omt ont a ker mòcht men a pasuach en ourt ont men lòk sechen abia as men tuat, en Bersntol, en Valzegu’ ont en Val Gardena. De vourstell van doi kurs ist kemmen gamòcht gester en de vria en de gamoa’sol va de Gamoa’ va Palai en Bersntol, pet de grias van innrichtn ont de pericht van iberòll viarer van Dipartiment urbanistik, strom, kataster, grunttisch ont lòntzòmmhòlt va de Autonome Provinz va Trea’t Giovanni Gardelli ont van vourstea’ner van TSM STEP Schual ver za regiarn en ourt ont de aussicht Gianluca Cepollaro.