Alcide De Gasperi. Album di casa
Inaudazion: ai 5 de setember da mesa les cater domesdì aló da Palazzo Trentini.
La mostra la é averta dai 5 de setember ai 4 de otober da les nef dadoman a les sie da sera con entrèda debant. Via per l dadoman de chesta sabedes da mesa les unesc dadoman vegn pervedù vijites compagnèdes.

La Presidenza del Consei de la Provinzia autonoma de Trent, en colaborazion co la Fondazion Museo storich del Trentin e co la Fondazion Trentina Alcide De Gasperi, la porta dant la fegura del gran statist da n pont de veduda privat e familièr, descheche recorda jà l titol de l’esposizion. Sarà n muie la fotografies fora de anter, desche De Gasperi canche l aea un an, De Gasperi con sia fies te sia cèsa te la val de Sella, ma ence a Roma.  
E l President del Consei di Ministres con sia femena Francesca Romani en viac de noza, l premier democristian endèna l viac storich ti Stac Unii del 1947, canche l é stat bon de ciapèr n didament finanzièl straordenèr per ge dèr nef engres a nosc Paisc do da la vera. Fi, om, père e giaf: n viac personèl su De Gasperi.

Esposizion permanenta “La Provincia si racconta”
Prejentazion nef format "PatStories competenze": ai 5 de setember da les unesc dadoman a la fin de la prejentazion vegnarà fat na vijita compagnèda averta a la comunanza.

L’esposizion permanenta “La Provincia si racconta”, rencurèda da la Fondazion Museo Storich del Trentin, l’à l obietif de “contèr” la storia, la situazion de anchecondì e l davegnir de la istituzion Provinzia sutonoma de Trent. L percors, spartì te desvalives postazions e instalazions, l tol ca l partiment uzà de la senta de Piazza Dante, a scomenzèr da l’entrèda prinzipèla enscin al portech Winkler.
“La Provincia si racconta” la porta dant con sia istalazions desvalives argomenc e lengac, ge dajan l met al vijitador de vardèr fora 50 egn de storia de l’autonomia tras l svilup de la competenzes ciapèdes col Secont Statut del 1972.
Element de gran emportanza per l’esposizion e l percors l é la testimonianzes de la femenes e di omegn che laora e che à lurà te Provinzia, ti desvalives enc e partimenc che met adum l sistem e che fèsc n mosaich de stories personèles che se enterzeea co la storia generèla de l’istituzion.  
L’esposizion la é stata agiornèda e integrèda da pech: l é stat enjignà de fat n nef format audiovisif dal titol "PatStories competenze", de chel che i prumes episodies i é dintornvia l’urbanistica, l stravardament e la defendura de la mendranzes, l lurier, i trasporc e la protezion zivila. Ai 5 de setember da les unesc dadoman l assessor con delega a la promozion de l’autonomia Simone Marchiori l portarà dant la neves, a la fin l é pervedù na vijita compagnèda, everta a duc.

Enjontà i placac

Traduzion di Servijes Linguistics e Culturèi del Comun general de Fascia